თბილისის მერიამ 19 მარტის დილიდან მეტრო მარჯანიშვილის მიმდებარე ტერიტორიაზე გარემოვაჭრეებს მუშაობის უფლება არ მისცა. როგორც მერია აცხადებს, "აღნიშნული მოთხოვნით, დედაქალაქის მთავრობას, რაიონულ გამგეობებსა და მაჟორიტარ დეპუტატებს არაერთხელ მიმართეს მოქალაქეებმა".

"გარდა იმისა, რომ ქმედება კანონსაწინააღმდეგოა, მოქალაქეები და დედაქალაქის სტუმრები შექმნილ პრობლემებზეც საუბრობენ, მათ შორისაა: შეფერხება გადაადგილებისას, უსაფრთხოების ნორმების დაცვის ხელშეშლა, ანტისანიტარია, მალფუჭებადი პროდუქტის შენახვის პირობების დაუცველობა, გაურკვეველი წარმოების პროდუქციის გაყიდვა, ქალაქში არსებული ტურისტული ზონებისა და თბილისის იერსახის დამახინჯება", – წერია თბილისის მერიის მიერ გავრცელებულ განცხდებაში.

გარემოვაჭრეების აყრა მარჯანიშვილის მიმდებარე ტერიტორიიდან. 19 მარტი, 2017.

ფოტო: თბილისის მერია

გარემოვაჭრეების აყრა მარჯანიშვილის მიმდებარე ტერიტორიიდან. 19 მარტი, 2017.

ფოტო: თბილისის მერია

როგორც მერია აცხადებს, თბილისის ტერიტორიაზე გარე ვაჭრობა შესაბამისი ნებართვის გარეშე დაუშვებელია და ამის თაობაზე არაერთხელ მიეცათ გაფრთხილება გარემოვაჭრეებს მერიის ზედამხედველობის საქალაქო სამსახურის მიერ, მათი მხრიდან აღნიშნული ქმედება ამ დრომდე არ აღკვეთილა:

"შესაბამისად, დღეს დილიდან, აღმაშენებლის გამზირზე, მეტრო მარჯანიშვილის მიმდებარედ გარემოვაჭრეებს უნებართვო საქმიანობის განხორციელების უფლება აღარ მიეცათ. მოგეხსენებათ, რომ აღნიშნული ლოკაცია დედაქალაქის ერთ-ერთი მთავარი ტურისტული და ხალხმრავალი ზონაა. პარალელურად, მერიის ზედამხედველობის სამსახური ტერიტორიიდან უნებართვო კონსტრუქციების აღებას იწყებს.

გარემოვაჭრეების აყრა მარჯანიშვილის მიმდებარე ტერიტორიიდან. 19 მარტი, 2017.

ფოტო: თბილისის მერია

გარემოვაჭრეების აყრა მარჯანიშვილის მიმდებარე ტერიტორიიდან. 19 მარტი, 2017.

ფოტო: თბილისის მერია

ანალოგიური ღონისძიებების განხორციელება უახლოეს მომავალში, ეტაპობრივად, დედაქალაქის მასშტაბით არსებულ სხვადასხვა ლოკაციაზეც განხორციელდება. უნებართვო სამეწარმეო საქმიანობის განხორციელების უფლება ცოტა ხნის წინ მეწარმეებს ვაჟა-ფშაველას ძეგლის მიმდებარე ტერიტორიაზეც აღარ მიეცათ".

მერიის თქმით, ის "ითვალისწინებს მოქალაქეების სოციალურ მდგომარეობას და მათ საქმიანობის გაგრძელებას სხვადასხვა სავაჭრო სივრცეში სთავაზობს. დედაქალაქის მთავრობა, ამ დროისათვის, მოლაპარაკებებს აწარმოებს ბაზრობების დირექტორებთან, რათა გარემოვაჭრეებს პირველი რამდენიმე თვის განმავლობაში ბაზრობებმა შესაბამისი სავაჭრო დახლები უფასოდ შესთავაზონ".

უკვე წლებია, თბილისის მეტროსადგურების მიმდებარე ტერიტორია და ხალხმრავალი ქუჩები არაერთი გარემოვაჭრისა და მისი ოჯახისთვის შემოსავლის მიღების ერთადერთი წყაროა. კონკრეტულად მეტრო მარჯანიშვილის მიმდებარე ტერიტორიაზე ათეულობით მოქალაქე ამ დრომდე ირჩენდა თავს ბუკინისტური წიგნების, პრესის, ხილ–ბოსტნეულის, ასევე სხვადასხვა წვრილმანის ვაჭრობით.