უკრაინის ტერიტორიული მთლიანობის დარღვევის გამო, ევროკავშირმა რუსეთს სანქციები კიდევ ექვსი თვით გაახანგრძლივა. სანქციები 2022 წლის 15 მარტამდე გაგრძელდება.

არსებული სანქციები 177 პირისა და 48 ორგანიზაციისთვის ევროკავშირის წევრი ქვეყნების ტერიტორიებზე მოგზაურობის შეზღუდვას, ფინანსური აქტივების გაყინვას და ეკონომიკური საქმიანობის განხორციელების აკრძალვას ითვალისწინებს.

უკრაინის კრიზისის საპასუხოდ განხორციელებული ევროკავშირის სხვა ზომები კი მოიცავს ეკონომიკურ სანქციებს, რომლებიც მიმართულია რუსეთის ეკონომიკის კონკრეტულ სექტორებზე 2022 წლის 31 იანვრამდე.

ევროკავშირმა უკრაინის ტერიტორიული მთლიანობის, სუვერენიტეტისა და დამოუკიდებლობის ხელყოფის ან საფრთხის შემცველი ქმედებების შემზღუდავი სანქციები პირველად 2014 წლის 17 მარტს, ყირიმის უკანონო ანექსიის შემდეგ დააწესა.