ამერიკელმა მსახიობმა, კრისტენ სტიუარტმა, პრინცესა დაიანას შესახებ ვენეციის კინოფესტივალზე გამართულ პრესკონფერენციაზე ისაუბრა. სტიუარტი თავად განასახიერებს ლედი დის ფილმში Spencer, რომლის მსოფლიო პრემიერაც სწორედ ვენეციის ფესტივალზე შედგა.

"არსებობენ ადამიანები, რომლებიც აშკარა ენერგიით არიან დაჯილდოებულნი", — ამბობს მსახიობი, — "თუმცა, რამდენადაც ჩვეულებრივი და მომხიბვლელი იყო, ამდენადვე გრძნობდა გარიყულობასა და მარტოობას. იგი ცდილობდა, მისი, ასეთი თვალისმომჭრელი სინათლის, გვერდით დგომა ყველას ეგრძნო და მხოლოდ ის სურდა, სხვებისგანაც იგივე მიეღო საპასუხოდ".

სტიუარტის თქმით, პრინცესა დაიანა ძალიან გულღია ადამიანიც იყო და იგი მასში ყველაზე მეტად ამას აფასებს.

პრესკონფერენციაზე მსახიობს ასევე ჰკითხეს, ხედავს თუ არა იგი მსგავსებას თავის თავსა და ლედი დის შორის, რადგან ორივე მათგანი მედიის ყურადღების ცენტრში იყო მოქცეული, თუმცა, სტიუარტს შეკითხვისთვის პირდაპირ არ უპასუხია.

"იგი მსოფლიოში ყველაზე ცნობილი ქალი იყო", — ამბობს კრისტენი, — "ეს დიდი დოზით თავადაც მიგემია, თუმცა, ახლოსაც ვერ მოვა მთელი ამ ხალხის გრანდიოზულობასთან".

ამის მიუხედავად, მსახიობის თქმით, მისთვის ნაცნობი მომენტია "სიტუაციაზე კონტროლის დაკარგვა", როცა საქმე ადამიანებზე მოხდენილ შთაბეჭდილებასა და შენ შესახებ მათი აზრის ჩამოყალიბებას ეხება:

"როცა იცი, რომ ქუჩაში ყურმოკრული ისტორია არასწორია, მაგრამ მისი შესწორება არ შეგიძლია.

"თუმცა, მისი ცხოვრება სწორედ ასეთი იყო და, რაღაც მომენტში, კბილების გამოჩენა გიწევს, რადგან ცხოველები ვართ და ეს ჩვეულებრივი ამბავია. ვფიქრობ, მასში მომხიბლავი ის იყო, რომ ყველა თავის მეგობრად მიიჩნევდა, თუმცა, ბედის ირონიაა, რომ იგი ამ დროს ყველაზე უცნობი ადამიანი იყო".

ფოტო: Fabula

Spencer-ის რეჟისორი, პაბლო ლარაინი, სტიუარტს "საოცრებას" უწოდებს. ლარაინის თქმით, მას ისეთი ფილმის გადაღება სურდა, რომელიც დედამისს მოეწონებოდა; ჩილელი რეჟისორი აღნიშნავს, რომ დედამისს დაიანასავით გამოწყობა უცდია.

"მსურდა, ისეთი ფილმი შემექმნა, სადაც დედაჩემისნაირი პიროვნების თვალით დანახული პრინცესა დაიანა იქნებოდა წარმოჩენილი", — დასძენს ლარაინი.

სტივენ ნაითის სცენარით გადაღებულ ფილმში მთავარ როლს კრისტენ სტიუარტი ასრულებს, პრინც ჩარლზს კი ჯეკ ფერთინგი ასახიერებს. ნაწარმოებში მოქმედება 1990-იანი წლების დასაწყისში ხდება, როცა პრინცესა დაიანა გავრცელებული ხმების შემდეგ პრინც ჩარლზთან გაშორებას გადაწყვეტს. ამ დროს ლედი დი შობის დღესასწაულს ნორფოლკში, სენდრინგჰემის მამულში ატარებდა სამეფო ოჯახთან ერთად.

ფილმს, რომლის სათაურადაც დაიანას გვარია გამოყენებული, მაყურებელი კინოთეატრებში 2022 წელს იხილავს. ამ წელს პრინცესა დაიანას ტრაგიკული გარდაცვალებიდან 25 წელი სრულდება.

ასევე იხილეთ: