საქართველოს უნივერსიტეტში ახალი პროექტის პრეზენტაცია შედგა, რომელიც უნივერსიტეტსა და ზოგადად ქვეყანაში სამეცნიერო კვლევების კომერციალიზაციას შეუწყობს ხელს - საქართველოს უნივერსიტეტმა ტექნოლოგიების ტრანსფერის ცენტრი დააფუძნა.

ტექნოლოგიების ტრანსფერის ცენტრი (ტტც), ღია ინოვაციების პრინციპზე დაყრდნობით იმუშავებს. ის უზრუნველყოფს ადგილობრივი და საერთაშორისო ბიზნესის ქართველ მეცნიერებთან დაკავშირებას, კონკრეტული სამეცნიერო ტექნოლოგიური პროექტების და პროცესების წარმოებისათვის.

ფოტო: საქართველოს უნივერსიტეტი

ცენტრი ადგილობრივ და საერთაშორისო ბაზარზე განახორციელებს ქართველი მეცნიერების აღმოჩენების კომერციალიზაციას. ტტც აქტიურად ითანამშრომლებს ინოვაციების კომერციალიზაციის ხელშეწყობის ისეთ საერთაშორისო სისტემებთან, როგორიცაა: Nine Sigma, Yet2.com, Innocentive. აღნიშნული სისტემები, თავის მხრივ, ახორციელებენ მეცნიერებისათვის დაკვეთების გენერაციას მსოფლიოს წამყვანი კომპანიებისაგან: P&G, Philips, Uniliver, Simens Electrolux, GlaxoSmithKline.

ტექნოლოგიების ტრანსფერის ცენტრი აქტიურად ითანამშრომლებს ქართულ ბინზესთან და გააანალიზებს მათ საჭიროებებს კვლევების და ინოვაციების მიმართულებით, რის შემდეგაც ქართველი მეცნიერების და ტექნოლოგიური სპეციალისტების თანამონაწილეობით აღნიშნული საჭიროებებისათვის ინოვაციურ პროდუქტს, პროცესს თუ სერვისს შექმნის. კომერციალიზაციის პროცესში, ცენტრი ხელს შეუწყობს მეცნიერების და ბიზნეს მიმართულების სტუდენტების ურთიერთქმედებას ახალი Start-up პროექტების გასაჩენად.

ტტც ხელს შეუწყობს კონსულტირებას ინტელექტუალური საკუთრების დაცვის მიმართულებითაც. ბიზნესის დაინტერესების შემთხვევაში, ტტც უზრუნველყოფს მეცნიერული ინოვაციის პირველადი პროტოტიპირებისათვის და გამოცდებისათვის ინფრასტრუქტურის მოძიებას.

ტექნოლოგიების ტრანსფერის ცენტრს უკვე დაწყებული აქვს ბიზნეს სექტორთან თანამშრომლობა და იმ პრობლემების თუ საჭიროებების იდენტიფიცირება, რომელიც შესაძლებელია გაუმჯობესდეს ქართველი მეცნიერების მონაწილეობით. პროცესი სოფლის მეურნეობის და მეცხოველეობის სექტორში მიმდინარეობს.