ცესკო-მ და ადგილობრივმა სადამკვირვებლო ორგანიზაციებმა 2021 წლის 2 ოქტომბრის მუნიციპალიტეტის ორგანოთა არჩევნების სამართლიან და ეთიკურ გარემოში ჩატარების მიზნით ქცევის კოდექსს მოაწრეს ხელი. ცესკოს ინფორმაციით, ხელმომწერები თანხმდებიან, რომ 2 ოქტომბრის არჩევნები საქართველოს კანონმდებლობით, საერთაშორისოდ აღიარებული სტანდარტებითა და აღნიშნული ქცევის კოდექსით წარიმართება.

ცესკო-ს თავმჯდომარემ, გიორგი კალანდარიშვილმა განაცხადა, რომ დოკუმენტში, რომლის ტექსტიც მხარეებმა ერთობლივად შეიმუშავეს, გაწერილია მათთვის შესასრულებელი ვალდებულებები.

"ასევე, საუბარია დეზინფორმაციაზე, მიუკერძოებლობაზე, კონსტრუქციულ თანამშრომლობაზე, რაც უპირობოდ მნიშვნელოვანია ჩვენი თანამშრომლობისთვის. მე დარწმუნებული ვარ, რომ არ გვექნება ისეთი ფაქტები არც ერთი და არც მეორე მხრიდან, როცა მოგვიწევს ერთმანეთს ვუსაყვედუროთ ამ პრინციპების დარღვევის გამო", — ამბობს კალანდარიშვილი.

დოკუმენტი ღიაა და მასზე ხელის მოწერა სურვილის შემთხვევაში ყველა იმ ადგილობრივ დამკვირვებელ ორგანიზაციას შეუძლია, რომელიც 2 ოქტომბრის არჩევნებისთვის იქნება რეგისტრირებული, ამ დროისთვის კი დოკუმენტს ხელს 31 სადამკვირვებლო ორგანიზაცია აწერს, მათ შორისაა:

  • საერთაშორისო გამჭირვალობა — საქართველო;
  • საქართველოს ახალგაზრდა იურისტთა ასოციაცია;
  • სამართლიანი არჩევნები;
  • მრავალეროვანი საქართველო;
  • ადამიანის უფლებათა ცენტრი.