ადამიანის უფლებათა დაცვის კომიტეტის თავმჯდომარე, ეკა ბესელია აცხადებს, რომ სტრასბურგის სასამართლოს არ აქვს უფლება, რუსთავი 2-ის საქმეზე უზენაესი სასამართლოს მიერ მიღებული გადაწყვეტილების შინაარსი შეცვალოს. ამის შესახებ მან რუსთავი 2-თან ისაუბრა:

"სტრასბურგის ადამიანის უფლებათა სასამართლო, ეს არ არის მეოთხე ინსტანციის სასამართლო. სტრასბურგის ადამიანის უფლებათა სასამართლო თავის თავს ესე უწოდებს, რომ ის არ ახდენს რევიზიას და არ ცვლის ეროვნულ დონეზე მიღებულ გადაწყვეტილებებს, ამიტომ, ნუ შევიყვანთ შეცდომაში საკუთარ თავს და ნურც საზოგადოებას, სტრასბურგის სასამართლო მხოლოდ კონვენციის კუთხით სწავლობს განაცხადებს, თორემ ის ეროვნულ დონეზე მიღებულ გადაწყვეტილებას ვერ შეცვლის".

ბესელია აცხადებს, რომ სტრასბურგის სასამართლოს მიერ მიღებული გადაწყვეტილება, უზენაესი სასამართლოს გადაწყვეტილების შეჩერების შესახებ, დროებითი ღონისძიებაა:

"შეჩერება ეს არის დროებითი ღონისძიება, რომელსაც იყენებს სასამართლო დროებით, მაგრამ, დროებითი ღონისძიების გამოყენება არ ნიშნავს, მიღებული გადაწყვეტილების შინაარსის შეცვლას.

ევროსასამართლოს არ შეუძლია გააუქმოს განაჩენი და გადაწყვეტილება და დაუბრუნოს ხელახალი განხილვისთვის".

გვარამიას გადაყენება და დავის გაგრძელება საკონსტიტუციო სასამართლოში - რა ელის რუსთავი 2-ს.