ლელოს ლიდერი, ბადრი ჯაფარიძე აცხადებს, რომ სუს-ის ამოცანა უნდა იყოს ჯაშუშების გამოვლენა, მათი დაკავება და არა ოპონენტების, თავისუფალი მედიისა და თავისივე გუნდის წევრების თვალთვალი.

"ამ წლების განმავლობაში ერთი უცხო ქვეყნის ჯაშუში არ იქნა გამოვლენილი და შეპყრობილი [...] სუს-მა ან უნდა თქვას, რომ არცერთ უცხო სახელმწიფოს არა აქვს საქართვრლოში ჯაშუშური ქსელი, რაც არის სრული აბსურდი — ჩვენ ვიცით, რომ ძალიან მძლავრი ქსელი აქვს მათ შორის ჩვენს ჩრდილოელ მეზობელს, მაგრამ, ერთი ჯაშუშიც კი არ გამოვლენილა და არ დაკავებულა. იმიტომ, რომ მთლიანად კონცენტრირებული არიან პოლიტიკური ოპონენტების თვალთვალზე, თავისუფალი მედიის თვალთვალზე. როგორც ჩანს, როგორც გუშინ მოვისმინეთ, ასევე საკუთარი პარტიის წევრების თვალთვალზე. ეს არის კატასტროფა", — განაცხადა მან.

მთავარი არხის დირექტორმა ნიკა გვარამიამ განაცხადა, რომ მოიპოვა სახელმწიფო უსაფრთხოების სამსახურის დოკუმენტები, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული. სავარაუდოდ, სუს-ის ჩანაწერებიდან, ირკვევა, რომ უწყებაში აქვთ ინფორმაცია ხსნებული საზოგადოებაში აქტიური პირების სექსუალური ორიენტაციის, პირადი ცხოვრების, სექსუალური პარტნიორების შესახებ და ეს ყველაფერი აღწერილია უწყების დოკუმენტში. ისევე, როგორც ჟურნალისტების სატელეფონო ზარები სხვადასხვა უწყებების პრესსამსახურებთან. გვარამია ამბობს, რომ ეს ჩანაწერები ქართული ოცნების დამფუძნებლის, ბიძინა ივანიშვილისთვის კეთდება და პროცესში სუს-ის უფროსები არიან ჩართული.

On.ge დაუკავშირდა სახელმწიფო უსაფრთხოების სამსახურს იმის გასარკვევად, რა რეაგირება ექნებათ ამ ინფორმაციაზე. უწყებაში თქვეს, რომ ამ საკითხზე კომენტარს არ გააკეთებენ.

ამასთან, საერთაშორისო გამჭვირვალობა — საქართველოს დირექტორის მოადგილე, გიორგი ონიანი, GDI-ს დამფუძნებელი, გიორგი მშვენიერაძე და სოციალური სამართლიანობის ცენტრის წარმომადგენელი, გურო იმნაძე ადასტურებენ, რომ გვარამიას გამოქვეყნებულ ჩანაწერებში აღწერილი დიალოგი შედგა.