ქართული ოცნება კახა კალაძის შესახებ ჟურნალისტური ეთიკის ქარტიის განცხადებას "სამარცხვინო ცილისწამებასა და ფაქტების დამახინჯებას" უწოდებს. ასე ეხმაურებიან ისინი ქარტიის შეფასებას 20 ივლისს კალაძის მიერ მედიაზე გაკეთებული განცხადების ირგვლივ.

"განვმარტავთ, რომ 20 ივლისის გამოსვლაში კახა კალაძემ ისაუბრა ძალადობის ფორმებზე და აღნიშნა, რომ ფიზიკურ ძალადობაზე "არანაკლები ბოროტებაა ფსიქოლოგიური ძალადობა, რასაც, სამწუხაროდ, ადგილი აქვს ჩვენ საზოგადოებაში". აქვე, კახა კალაძის თქმით, ეს საზოგადოებრივი პრობლემა აისახება ტელეეთერებშიც. კერძოდ, მან აღნიშნა, რომ "ხშირად ვისმენთ სხვადასხვა ტელეეთერიდან ადამიანების დამცირებას, ცილისწამებას, მათ ბულინგს მხოლოდ და მხოლოდ განსხვავებული პოლიტიკური თუ სხვა ნიშნის გამო". ცალსახაა, რომ ქარტიის განცხადება ემსახურება საზოგადოების დეზინფორმირებას და წარმოადგენს ცილისწამებას", — ნათქვამია პარტიის განცხადებაში.

ქართული ოცნება ქარტიისგან მოითხოვს განმარტება, რის საფუძველზე ამოიკითხეს "აგრესიული რიტორიკა" კახა კალაძის მიერ 20 ივლისს გაკეთებულ განცხადებაში.

"იქიდან გამომდინარე, რომ ჟურნალისტური ეთიკის ქარტიის მხრიდან გამოთქმული არცერთი ბრალდება არ დასტურდება ფაქტებით, მოვუწოდებთ ქარტიას, გააკეთოს განმარტება დაუსაბუთებელ ბრალდებებზე. ასევე, ვურჩევთ, გაითვალისწინონ წინასაარჩევნო გარემო და სიფრთხილით მოეკიდონ ნებისმიერ კანდიდატთან დაკავშირებით გამოთქმულ შეფასებებს, ვინაიდან ყოველი მცდარი და საზოგადოების შეცდომაში შემყვანი განცხადება მხოლოდ და მხოლოდ აზარალებს დემოკრატიულ პროცესებს", — ვკითხულობთ განცხადებაში.

დღეს ჟურნალისტური ეთიკის ქარტიამ განცხადება გაავრცელა, სადაც აღნიშნული იყო, რომ კალაძემ "მედიის საქმიანობა ძალადობრივი ჯგუფების ქმედებებს შეადარა", რასაც ისინი გმობდნენ. 20 ივლისს თბილისის მერობის კანდიდატად წარდგენის შემდეგ, კახა კალაძემ ჟურნალისტებს მიმართა და 5 ივლისს მათ მიმართ განხორციელებული ძალადობა გაუთანაბრა ბულინგს, ცილისწამებასა და დამცირებას, რასაც, მისივე მტკიცებით, ტელეეთერებიდან ვისმენთ.