ისრაელის მთავრობამ ოფიციალურად დაამტკიცა გეგმა, მარიხუანის საჯარო სივრცეში მოხმარების დეკრიმინალიზაციის შესახებ.

New York Times-ის ინფორმაციით, მინისტრთა კაბინეტის მიერ დამტკიცებული გეგმით, მომხმარებლები, ნაცვლად სისხლის სამართლებრივი სასჯელისა, ადმინისტრაციული წესით დაჯარიმდებიან.

კერძოდ, ისინი, რომლებიც მარიხუანას პირველად მოიხმარენ, დაეკისრებათ ჯარიმა $270-ის ოდენობით, ხოლო მეორედ მოხმარებისას, სასჯელი გაორმაგდება. მესამე ჯერზე სანქცია ითვალისწინებს გამოსაცდელი ვადის მისჯას, ხოლო სისხლის სამართლის პასუხისმგებლობა დადგება მხოლოდ მეოთხე შემთხვევისას.

პროექტის თანახმად, კანაფის შენახვა, შეძენა და წარმოება, ისევ არალეგალური იქნება.

როგორც FoxNews წერს, აღნიშნული გადაწყვეტილება "არ ნიშნავს იმას, რომ იერუსალიმი ამსტერდამს დაემსგავსება". როგორც ადგილობრივი მედიასაშუალება, Haaretz daily აღნიშნავს, თავდაპირველად, კომიტეტმა რეგულირების გზები უნდა შეისწავლოს.

ოპოზიციონერი დეპუტატის, თამარ ზანდბერგის თქმით, ეს მნიშნელოვანი, მაგრამ არა საბოლოო ნაბიჯია: "ეს გადაწყვეტილება არის მესიჯი იმისა, რომ მარიხუანის მომხმარებელი ისრაელელები კრიმინალები არ არიან".

BBC იშველიებს გაეროს სტატისტიკას, რომლის თანახმად, ისრაელში მოსახლეობის დაახლოებით ცხრა პროცენტი მოიხმარს კანაფს, თუმცა ზოგიერთი ექსპერტის მოსაზრებით, ეს რიცხვი გაცილებით მაღალია.

ამას გარდა, ისრაელში, სადაც 8,5 მილიონი ადამიანი ცხოვრობს, 25 ათასს აქვს სამედიცინო მარიხუანის მოხმარების ცნობა, კიბოსთან, ეპილეფსიასთან და სხვა დაავადებებთან გასამკლავლებლად.