ტელეკომპანია რუსთავი 2-ის ყოფილი მფლობელი, გიორგი ყარამანიშვილი ამბობს, რომ არხის სასამართლო პროცესები პოლიტიზირებული იყო და ორ პირს შორის კერძო დავა არასდროს ყოფილა. მისი თქმით, ისინი ყველა დარჩენილ სამართლებრივ გზას გამოიყენებენ. ამის შესახებ ყარამანიშილმა რუსთავი 2-ის ეთერში ისაუბრა.

"ჩვენ და ქიბარ ხალვაშს, არასდროს არანაირი ურთიერთობა რუსთავი 2-თან დაკავშირებით არ გვქონია. მაშინ, როდესაც ჩვენ გავხდით მფლობელები, არავითარი სამართლებრივი დავა და პრეტენზიები კომპანიასთან დაკავშირებით არ არსებობდა. მიუხედავად ამ აბსურდისა, ქართულმა სასამართლომ მაინც მიიღო გადაწყვეტილება, რომელმაც ერთბაშად გაანადგურა საქართველოში სიტყვის თავისუფლების, საკუთრების და სამართლიანი სასამართლოს უფლება. შეილახა საქართველოს კონსტიტუციით და საერთაშორისო კონვენციებით გარანტირებული ჩვენი უფლებები. ამიტომ ჩვენი უფლებების დასაცავად მივმართავთ ყველა დარჩენილ სამართლებრივ გზას, მივმართავთ საკონსტიტუციო სასამართლოს დაუყოვნებლივ განიხილოს ჩვენი სარჩელები. მივმართავთ სტრასბურგის ადამიანის უფლებათა სასამართლოს სარჩელის შეტანამდე გამოიყენოს დროებითი ღონისძიება და შეაჩეროს უზენაესი სასამართლოს მიერ მიღებული უკანონო გადაწყვეტილება,“-განაცხადა გია ყარამანიშვილმა.

საქართველოს უზენაესმა სასამართლომ გუშინ ტელეკომპანია რუსთავი 2-ის 100 პროცენტიანი წილი ლევან და გიორგი ყარამანიშვილებს, ნინო ნიჟარაძესა და შპს ტელეკომპანია საქართველოს ნაცვლად ქიბარ ხალვაშსა და მის კომპანიას - შპს პანორამას მიაკუთვნა.