ავსტრიის დედაქალაქ ვენაში 19 ივნისს 25-დ გაიმართა პრაიდის მსვლელობა. ღონისძიების მთავარი გზავნილი "ცისარტყელის მარში" იყო და მონაწილეებს უამრავი მოქალაქე შეუერთდა. ლესბოსელების, გეების, ბისექსუალების, ტრანსგენდერების, ინტერსექსებისა და ქვიარების უფლებები ქალაქში ათობით ათასმა ადამიანმა იზეიმა. Euronews-ის ცნობით, მოქალაქეები არაოჯახისწევრებისგან 1-მეტრიან დისტანციას იცავდნენ და პირბადეებს ატარებდნენ.

ამასთან ერთად, ვენის პრაიდის მონაწილეებმა მხარი დაუჭირეს თბილისი პრაიდსაც, რომელიც 5 ივლისს ღირსების მარშის გამართვას გეგმავს. ინფორმაციას ორგანიზატორები ფეისბუქგვერდზე ავრცელებენ:

"გუშინ, ავსტრიის დედაქალაქ ვენაში გამართულ პრაიდ მსვლელობაზე ჩვენი მხარდამჭერი ბანერი გამოჩნდა! ავსტრიელი აქტივისტებისგან წერილიც მივიღეთ:

'სამწუხაროდ ჩვენი გუნდი სრული შემადგენლობით ვერ ახერხებს თბილისში ჩამოსვლას, თუმცა რამდენიმემ უკვე იყიდა ბილეთი და ღირსების მარშში თქვენთან ერთად მივიღებთ მონაწილეობას'".

ფოტო 19 ივნისს გამართულ ვენის პრაიდის მსვლელობიდან. დემონსტრანტებს ბანერი უჭირავთ წარწერით "სოლიდარობა Tbilisi Pride-ს".

ფოტო: Tbilisi Pride / Facebook

Tbilisi Pride 5 ივლისს ღირსების მარშს გამართავს, რომელიც კვირეულის ფარგლებში ეწყობა. მარშის სლოგანია "გამოდი სოლიდარობისთვის".

ძალადობრივი და ჰომოფობიური ჯგუფის ლიდერი, ლევან ვასაძე ღირსების მარშის გაუქმებას მოითხოვს და ხელისუფლებას ამისთვის 10-დღიან ვადას აძლევს.

გარდა ამისა, ვასაძე ქართული ოცნებისგან ისეთი კანონმდებლობის მიღებას მოითხოვს, რომელიც ქვიარ თემის გამოხატვის თავისუფლებას შეზღუდავს.

თბილისი პრაიდის მარშის ჩატარებაზე ლევან ვასაძის ულტიმატუმს მმართველი პარტიიდან თავდაპირველად გია ვოლსკი გამოეხმაურა და თქვა, რომ "ამის პოპულარიზაციისა და რეკლამირების" წინააღმდეგია. ქართული ოცნების თავმჯდომარის, ირაკლი კობახიძის განცხადებით, "სრული კონტექსტის გათვალისწინებით", პრაიდის კვირეულის ჩატარებაზე უარი უნდა ეთქვათ.

ჯანდაცვის ყოფილმა მინისტრმა და საქართველოს პარლამენტის წევრმა, დავით სერგეენკომ კი ჰომოფობიურ განცხადება გააკეთა. ამასთან, პრაიდის კვირეულთან დაკავშირებით მან "ზომიერებისა" და "ნაკლები ენთუზიაზმისკენ" მოუწოდა.

სამოქალაქო ორგანიზაციები ქართული ოცნების წარმომადგენლების ჰომოფობიურ განცხადებებს გმობენ, შსს კი აცხადებს, რომ ღირსების მარშზე პოლიცია კანონის შესაბამისად იმოქმედებს.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა.