საქართველოს პარლამენტის წევრის, სალომე სამადაშვილის განცხადებით, მას შემდეგ რაც ნიკა რურუა გათავისუფლდება, ის ნაციონალური მოძრაობის თავმჯდომარე, ნიკა მელიას სამატიმროში მოინახულებს.

"დღეს ჩვენ დავრეგისტრირდებით პარლამენტში, რის შედეგადაც გათავისუფლდება პატიმრობიდან გიორგი რურუა. ამის შემდეგ ვაპირებ დღეს ან ხვალ მივიდე ნიკასთან საპატიმროში და ვესაუბრო მას შემდგომ ნაბიჯებზე, იმიტომ რომ ჩემი ძალიან დიდი სურვილია, აღდგომის დღესასწაულს ნიკა მელია შეხვდეს საკუთარ სახლში და ოჯახში. ამის შემდეგ, იმედი მაქვს ნიკა მალე გათავისუფლდება, ნაციონალური მოძრაობა მიიღებს თავის გადაწყვეტილებას და მინდა გამოვთქვა ჩემი ძალიან დიდი იმედი და სურვილი, რომ ნაციონალური მოძრაობის დეპუტაცია სრულად იყოს წარმოდგენილი პარლამენტში და ჩვენ მათთან ერთად ვიმუშაოთ ამ შეთანხმების იმპლემენტაციაზე", — განაცხადა სამადაშვილმა პარლამენტში.

6-თვიანი ბოიკოტის შემდეგ 27 აპრილს ოპოზიციის ნაწილი პარლამენტში მივიდა. პარლამენტში პირველად მივიდნენ: ლელო, სტრატეგია აღმაშენებელი, რესპუბლიკური პარტია, გირჩი — მეტი თავისუფლება, ასევე, ინდივიდუალურად არიან სალომე სამადაშვილი, შალვა შავგულიძე და არმაზ ახვლედიანი. პარლამენტში არ არიან და დოკუმენტს ხელს არ აწერენ ნაციონალური მოძრაობა, ევროპული საქართველო, ლეიბორისტული პარტია და პატრიოტთა ალიანსი.

საკანონმდებლო ორგანოში უკვე არიან გირჩი და მოქალაქეები. მათგან ალეკო ელისაშვილის პარტია უკვე მონაწილეობს საპარლამენტო საქმიანობაში, ხოლო ხვიჩია, მეგრელიშვილი და რაქვიაშვილი აცხადებენ, რომ მხოლოდ საპარლამენტო ტრიბუნას გამოიყენებენ, ასევე, ისარგებლებენ იარაღის ტარების უფლებითა და დეპუტატის იმუნიტეტით.

პარლამენტში მისული ოპოზიცია დღეს, სავარაუდოდ, ამნისტიის შესახებ კანონპროექტს დაარეგისტრირებს, რომელიც შეთანხმების თანახმად, ნაციონალური მოძრაობის თავმჯდომარის, ნიკა მელიას შეეხება. ასევე, დღეს პრეზიდენტი სალომე ზურაბიშვილი გიორგი რურუას შეწყალების აქტს გამოსცემს.

თავდაპირველად, ნაციონალური მოძრაობის თავმჯდომარემ, ნიკა მელიამ შეთანხმებაში გათვალისწინებულ ევროკავშირის მიერ შემოთავაზებულ გირაოზე უარი განაცხადა, თუმცა 26 აპრილს მან გირაოთი გათავისუფლებაზე მზადყოფნა გამოთქვა, იმ შემთხვევაში, თუ ამნისტიის კანონს უკან გაითხოვენ.

ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და ორმა დამოუკიდებელმა დეპუტატმა 19 აპრილს მოაწერა ხელი. ხელმოწერის ცერემონია პრეზიდენტის სასახლეში გაიმართა. ხელმოწერის ცერემონიას ონლაინ დაესწრო შარლ მიშელიც.