ნაციონალური მოძრაობის თავმჯდომარის, ნიკა მელიას ერთ-ერთი ადვოკატი, ბექა ბასილაია ამბობს, რომ მელიას მომდევნო პროცესი ქვეყანაში მიმდინარე პოლიტიკურ პროცესთან იქნება დაკავშირებული და არა სამართლებრივ განხილებთან.

"დღევანდელი სხდომის ყველაზე ღირსშესანიშნავი მოვლენა იყო ის, რომ პროკურატურის წარმომადგენლებს დაემატა კიდევ ერთი პროკურორი და შეეცადა, რომ პროცესზე შექმნას ფონი, თითქოს, სახელმწიფო ბრალდება სამაართლებრვი ჩარჩოებშია და თითქოს, ეს საქმე პოლიტიკურ ჭრილში არ უნდა განიხილებოდეს.

13 აპრილსა და მომდევნო პროცესებზე რაც იქნება თავიდან ბოლომდე დამოკიდებული იქნება ქვეყანაში მიმდინარე პოლიტიკურ პროცესთან და არა სამართლებრივ განხილვებთან", — განაცხადა ბასილაიამ რადიო თავისუფლებასთან.

მოსამართლის გადაწყვეტილებით, ნიკა მელიას სასამართლო პროცესი გადაიდო. სხდომებზე დასწრების უფლება მიეცეს ბრალდებულ მელიასაც, რომელიც დღეს ადგილზე აკრძალვის გამო არ იმყოფებოდა. მომდევნო სხდომა 13 აპრილს, 11:00 საათზე ჩაინიშნა.

ენმ-ის თავმჯდომარის პროცესებზე დასწრების შესახებ შუამდგომლობა მისმა ადვოკატებმა დააყენეს, რომელიც მოსამართლემ დააკმაყოფილა. პროკურატურის პოზიციაც იყო, რომ ამის წინააღმდეგი არ იქნება, თუმცა ბრალდების მხარე იმედს იტოვებს, რომ "საქმის არსებითი განხილვა გაგრძელდება კონსტრუქციულ რეჟიმში და წესრიგი არ დაირღვევა".

ნიკა მელიას სხდომაზე დასწრების უფლება წინა პროცესიდან გაძევების გამო არ ჰქონდა. ადვოკატი დღევანდელი სხდომის დაწყებამდე ამბობდა, რომ მელიას დაშვება მოითხოვა, თუმცა უფლება არ მისცეს.

2020 წლის 17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. მელია, სხვა ოპოზიციური პარტიები ლიდერებთან ერთად, ენმ-ის ოფისში მივიდა და პოლიციასაც იქ ელოდებოდა. თუმცა, დაკავება პრემიერმინისტრ გიორგი გახარიას გადადგომის გამო გადაიდო. თანამდებობის დატოვება გახარიამ ნიკა მელიას საქმეს დაუკავშირა და თქვა, რომ გუნდში ამაზე "აზრთა სხვადასხვაობა" იყო. ახალი პრემიერმინისტრის დანიშვნიდან რამდენიმე საათში, 23 თებერვალს, მელია დააკავეს, თან ისე, რომ სპეცრაზმი ენმ-ის ოფისში შევიდა როგორც სახურავიდან, ისე პირველ სართულზე არსებული შესასვლელებიდან, ოთახში გამოიყენეს გაზიც.

აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.