ქართული ოცნების წევრის, დიმიტრი ხუნდაძის თქმით, როცა "შეურაცხყოფა მუდმივ ხასიათს" ღებულობს, ადამიანს შეიძლება ნერვებმა უმტყუნოს. ამის შესახებ მან ოპოზიციის წინააღმდეგ გამართული აქციების შეფასებისას განაცხადა.

"ქართული ოცნების სტილი ძალადობა და შეურაცხყოფა არაა, მაგრამ როცა შეურაცხყოფა ღებულობს მუდმივ ხასიათს, რა თქმა უნდა, ზოგჯერ ემოციებმა შესაძლოა ყველა ადამიანს უმტყუნოს. ამიტომ ყველამ თავი უნდა შევიკავოთ, რადგან მცირე ძალადობა წარმოშობს შემდგომში დიდ ძალადობას", — აღნიშნა ხუნდაძემ.

4 აპრილს, ბათუმში ქართული ოცნების მხარდამჭერებმა ოპოზიციას კონტრაქცია მოუწყვეს და მათ ოფისებთან ცოცხებით მივიდნენ. გარდა ამისა, აქციის მონაწილეებმა ოპოზიციის ოფისებზე სტიკერები გააკრეს.

გარდა ამისა, რუსთავში ნაციონალური მოძრაობის წევრი, გიორგი მღებრიშვილი დაჭრეს. თავდასხმაში ბრალდებული უკვე დაკავებულია.