ახალგაზრდა იურისტთა ასოციაციის ცნობით, დღეს, ადვოკატი ლევან ვეფხვაძე დეკანოზ გიორგი მამალაძეს მე-9 დაწესებულებაში მოინახულებს. როგორც ორგანიზაცია განმარტავს, საიას დახმარების თხოვნით დაკავებულის ოჯახმა მომართა.

საია მიიჩნევს, რომ დეკანოზ მამალაძის საქმეზე გაკეთებული განცხადებები არღვევს მის უდანაშაულობის პრეზუმფციას და ხელს უწყობს საზოგადოებრივი აზრის ჩამოყალიბებას ერთმნიშვნელოვნად ბრალდებულის წინააღმდეგ.

ორგანიზაციის მიერ გავრცელებულ განცხადებაში ნათქვამია, რომ ბრალდებულის მიმართ პროკურატურის წარმომადგენელთა და პოლიტიკური თანამდებობის პირთა მიერ გაკეთებულ განცხადებები გაუმართლებელია:

"განცხადებების შინაარსი ქმნის შთაბეჭდილებას, რომ დანაშაულის ჩადენის ფაქტი და მასში ბრალდებულის მონაწილეობა უკვე დადგენილ და უტყუარ ფაქტებს წარმოადგენს, მაშინ, როცა საქმეზე გამოძიება ჯერ არ დასრულებულა, ხოლო სასამართლოს - ერთადერთ ინსტანციას საქართველოში, ვისაც აქვს კანონით მინიჭებული ლეგიტიმური უფლება, პირი გამოაცხადოს დამნაშავედ - ჯერ არ დაუწყია საქმის განხილვა".

მთავარი პროკურატურის ცნობით, 2017 წლის 10 თებერვალს, მკვლელობის მომზადების ბრალდებით, დეკანოზი გიორგი მამალაძე დააკავეს. პროკურატურის მტკიცებით, გიორგი მამალაძე აპირებდა გერმანიაში გამგზავრებას, სადაც პატრიარქი იმყოფებოდა სამკურნალოდ. უწყების განცხადებით, უცნობმა პირმა მიმართა პროკურატურას და მიუთითა, რომ მამალაძეს უნდა მოეხდინა მაღალი იერარქიის სასულიერო პირის სიცოცხლის ხელყოფა.