ქართული ოცნების დეპუტატი, სოზარ სუბარი აცხადებს, რომ 23 მარტს აშშ-ის სენატში ჩატარებული მოსმენები საქართველოსთან დაკავშირებით იყო ბოლო "ლურსმანი ოპოზიციური ბოიკოტის კუბოზე". ეს განცხადება მან იმედის ეთერში გააკეთა.

"სენატის მოსმენები იყო ბოლო ლურსმანი ოპოზიციური ბოიკოტის კუბოზე. ბოლო ლურსმანი, რომელმაც დაასამარა საბოლოოდ ბოიკოტის თემის რაღაცა ტიპის ლეგიტიმურობაც კი. ეს ლეგიტიმურობა ისედაც არ არსებობდა, ისედაც ყველა მოუწოდებდა მათ, რომ შესულიყვნენ პარლამენტში, მაგრამ ეს უკვე საბოლოო წერტილი იყო", — განაცხადა სუბარმა.

მისივე თქმით, მსოფლიოში მხოლოდ ორი ქვეყანა დარჩა, ჩრდილოეთ კორეა და რუსეთის ფედერაცია, რომელსაც ოპოზიციისთვის პარლამენტში შესვლისკენ არ მოუწოდებია.

23 მარტს სენატის საგარეო კომიტეტის სხდომაზე საქართველოში დემოკრატიის მდგომარეობის შესახებ მოსმენა გაიმართა. სენატორებმა საქართველოში არსებული პოლიტიკური კრიზისი შეაფასეს. სენატორმა ჯიმ რიშმა სენატის საგარეო კომიტეტის სხდომაზე განაცხადა, რომ საქართველო ახლა კრიტიკულ მომენტშია. მისივე თქმით, თუ დემოკრატიამ ახლა არ იმუშავა, ქვეყანა ევროატლანტიკურ სტრუქტურებში გაწევრიანების შანსს დაკარგავს.

განცხადებები შეეხო ნაციონალური მოძრაობის ლიდერის, ნიკა მელიას დაპატიმრებასაც. ამერიკის შეერთებული შტატების სახელმწიფო მდივნის მეორე მოადგილემ, ჯორჯ კენტმა სენატის საგარეო კომიტეტის სხდომაზე განაცხადა, რომ საქართველოში ოპოზიციური პარტიის ლიდერის, ნიკა მელიას დაკავება ქართული დემოკრატიისთვის უკან გადადგმული ნაბიჯი იყო.

საბოლოოდ, ამერიკის შეერთებული შტატების სენატში საქართველოში არსებულ პოლიტიკურ კრიზისზე რეზოლუციის მიღების შესახებ განაცხადეს. რეზოლუციის მიღების ინიციატივა სენატორმა როს ჯონსონმა წამოაყენა. ჯონსონის თქმით, ეს მხარეებისთვის მნიშვნელოვანი სიგნალი იქნება.