გირჩის ერთ-ერთი ლიდერის, იაგო ხვიჩიას განცხადებით, ოპოზიცია და მმართველი პარტია "რაღაც სამართლიან პირობაზე უნდა შერიგდეს, იმიტომ, რომ ეს შერიგება არ იყოს კაპიტულაცია". ამის შესახებ მან Postv-ის ეთერში ისაუბრა.

"როცა ქართული ოცნება სიტყვით ლაპარაკობს, სამართლიანი პრინციპი უნდა დაიდოსო და სამართლიანობაზე წავალთო, ჩემი აზრით, მეც ასე ზოგადად შემიძლია შემოვიფარგლო. ეს კარგი დახასიათებაა. სამართლიანი, ოღონდ უნდა შეეძლოს ქართულ ოცნებასაც და ყველას, თქვენთან მოსვლა და კითხვებზე პასუხის გაცემა, რომ გავარჩიოთ — რა რატომ არის სამართლიანი და რა რატომ არის უსამართლო. ჩემი აზრით, აი, ასეთი პირობა არის ის პირობა, რაზეც ჩვენ, შეიძლება, ახლა შევრიგდეთ. ანუ, რაღაც სამართლიან პირობაზე უნდა შევრიგდეთ, იმიტომ, რომ ეს შერიგება არ იყოს კაპიტულაცია და იყოს სამართლიან პირობაზე შერიგება.

ყველა პარტიისთვის ეს სხვადასხვა რამეა. ყველა პარტია თავისი პრიზმიდან უყურებს ამ საკითხს. მე შემიძლია, მხოლოდ ჩემი პარტიის პრიზმიდან შევხედო ამ საკითხს და ავხსნა, რატომ მგონია რაღაც სამართლიანი ყველა მოთამაშისთვის, ვინც იქ არის. სხვა პარტიებს ამაზე განსხვავებული შეხედულებები აქვს. მთელი ამოცანა ამ მოლაპარაკებების პროცესის იმაში მდგომარეობს, რომ ჩვენი ეს განსხვავებული შეხედულებები დავაახლოვოთ ყველამ სამართლიანობის პრინციპის მიმართულებით. რაც ნიშნავს, რომ ლოგიკასთან ყველანი უნდა ვიყოთ მართლები, რაზეც შევთანხმდებით. მე მზად ვარ ამისთვის ყველა მიმართულებით, მაგრამ ჩემი კოლეგები, არც ხელისუფლებიდან და არც ოპოზიციიდან, ჩემდა სამწუხაროდ, ამისთვის არ არიან მზად", — თქვა მან.

22 მარტს შარლ მიშელმა განაცხადა, რომ დანიელსონი საქართველოში მედიაციის გასაგრძელებლად დაბრუნდებოდა. მისი თქმით, საქართველოს მოქალაქეების ინტერესებისთვის, კომპრომისებზე წავსლის დროა. დანიელსონის ბოლო ვიზიტის დროს, ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

დანიელსონი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.