კურიერის წამყვანის, ზაალ უდუმაშვილის განცხადებით, რუსთავი 2-ის საქმის განხილვა გადამწყვეტ ეტაპზეა. მისივე თქმით, არხის ათასამდე თანამშრომელი იბრძოლებს ტელეკომპანიისთვის და არც ერთი ნაბიჯით არ დაიხევს უკან:

"მინდა მივმართო ხელისუფლებას და იმ პრიმიტიულ ადამიანებს, რომლებმაც ასეთი სცენარი მოიფიქრეს და დაგეგმეს - რუსთავი 2-ში ათასამდე ადამიანი მუშაობს, რომელიც სისხლის ბოლო წვეთამდე იბრძოლებს ამ ტელეკომპანიისთვის, არც ერთი ნაბიჯით არავინ არ დაიხევს უკან, ამის პირობას ვდებ მე ზაალ უდუმაშვილი, რომელიც წლებია ამ ტელეკომპანიაში ვმუშაობ, ჩემთან ერთად ამ პირობას დებს ის ადამიანები რომლებიც აქ არიან და კიდევ ის ასეულობით ადამიანი რომელიც ამ შენობაში იმყოფება. ეს ტელევიზია იმუშავებს ისე როგორც აქამდე მუშაობდა. ძალიან სამწუხაროა და ალბათ ვერასდროს წარმოვიდგენდი, რომ თავისუფალი სიტყვის დაცვა რუსთავიორელებს მოგვიწევდა ქუჩაში გასვლით. სამწუხაროდ ასეთი დროც დაგვიდგა. ძალიან რთულია ერთმა ტელეკომპანიამ ებრძოლოს სახელმწიფო მანქანას. ამიტომ გვჭირდება საზოგადოების მხარდაჭერა."

ტელეკომპანია რუსთავი 2-ის დირექტორის, ნიკა გვარამიას განცხადებით, მან მინდობილობით ტელეკომპანიის მართვის უფლება გადასცა მის პირველ მოადგილეს, ზაალ უდუმაშვილს. მათი თქმით, ტელეკომპანიის თანამშრომლები მხარდამჭერებთან ერთად კვირას, თბილისში, პარლამენტის შენობასთან აქციას გეგმავენ.

გვარამია გამოკითხვაზე არ მიდის. მისი თქმით, ის არ ენდობა საქართველოს შინაგან საქმეთა სამინისტროს, ითხოვს ჩანაწერებისთვის დამოუკიდებელ ექსპერტიზას და სასამართლოს საშუალებით დაკითხვას.