პარლამენტში ქართული ოცნების დეპუტატი, გურამ მაჭარაშვილი ამბობს, რომ ქართული ოცნების კონკურენტი მხოლოდ ქვეყანაში არსებული გამოწვევებია. ამის შესახებ მან TV პირველს განუცხადა.

"ნებისმიერ ადამიანს ან ადამიანთა ჯგუფს, ვისაც სურს, რომ ქართულ პოლიტიკაში მიიღოს მონაწილეობა, სიამოვნებით შევხვდებით, თუკი ეს იქნება მისი პირადი გადაწყვეტილება. [...] ოცნებისთვის კონკურენტია ის გამოწვევები, რაც არსებობს ქვეყანაში, მეტი სხვა არავინ", — აღნიშნავს დეპუტატი.

პრემიერობიდან გადადგომის შემდეგ გიორგი გახარიამ ჟურნალისტებს პირველად განუცხადა, რომ პოლიტიკიდან წასვლას არ აპირებს.

"რეალურად, გეგმებს მივყვებით, ჩვენს დღის წესრიგს, რაც მოგვცემს იმის შესაძლებლობას და საშუალებას, რომ უახლოეს პერიოდში ყველაფერი დეტალურად გაგიზიაროთ და მოგიყვეთ", — განაცხადა გახარიამ.

მოგვიანებით, პოლიტიკაში დარჩენის შესახებ მან ფეისბუქზე დაწერა.

ნიკა მელიასთვის პატიმრობის შეფარდებიდან რამდენიმე საათში 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

გახარიამ მაშინ განაცხადა, რომ მისი ურყევი პოზიციაა, "ერთი კონკრეტული ადამიანის მიმართ თუნდაც კანონიერი, მართლმსაჯულებით განსაზღვრული ღონისძიების აღსრულება, თუ ეს რისკს უქმნის ჩვენი მოქალაქეების ჯანმრთელობას, სიცოცხლეს ან საერთოდ ქვეყანაში ქმნის პოლიტიკური ესკალაციის შესაძლებლობას, არის მიუღებელი".