ევროპარლამენტარმა რასა იუკნევიჩიენემ საქართველოში შექმნილ პოლიტიკურ ვითარებასთან დაკავშირებულ განხილვაზე განაცხადა, რომ დღეს მას უფრო მეტი კითხვა აქვს საქართველოს შესახებ, ვიდრე პასუხი. მისი თქმით, აქამდე ცხადი იყო, რომ საქართველო აღმოსავლეთის პარტნიორობის ქვეყნებს შორის ლიდერი იყო რეფორმების, მაგრამ მან აღნიშნა, რომ დღეს მათ პარტნიორს პოლიტიკური პასუხისმგებლობის კრიზისი აქვს.

"დღეს მე ვერ ვხედავ ვერავის პოლიტიკურ სპექტრში, ვისაც სურს და მზად არის ქვეყნის მომავალზე პასუხისმგებლობა აიღოს. შარლ მიშელმა საქართველოს ევროკავშირის დახმარების ხელი შესთავაზა. თუ საქართველოში არავინ მიიღებს ამას, ჩვენი საერთო მარცხი მხოლოდ ერთმა ქვეყანამ უნდა აღნიშნოს, ვისაც საქართველოს ტერიტორიები ოკუპირებული აქვს.

ძვირფასო მეგობრებო საქართველოდან, არავინ შეიძლება გარედან იმაზე მეტი მეგობარი იყოს თქვენი ქვეყნის, ვიდრე თავად თქვენ, ქართველები. გისურვებთ გამბედაობას, რათა პოლიტიკური პასუხისმგებლობები ევროპული დემოკრატიული საქართველოსთვის აიღოთ", — განაცხადა რასა იუკნევიჩიენემ ევროპარლამენტში სიტყვით გამოსვლისას.

ევროპარლამენტის საგაზაფხულო სესიის ფარგლებში საქართველოში არსებულ პოლიტიკურ ვითარებასთან დაკავშირებით დებატები მიმდინარეობს. დებატების საკითხი საგაზაფხულო სესიის დღის წესრიგში ევროპელი დეპუტატების ინიციატივით შევიდა. საქართველოს შესახებ მომხსენებელი ევროკავშირის საგარეო ურთიერთობებისა და უსაფრთხოების საკითხებში ევროკავშირის უმაღლესი წარმომადგენელი და ევროკომისიის ვიცე-პრეზიდენტი, ჯოზეფ ბორელია.

ევროპარლამენტის პლენარულ სესიას ესწრება საქართველოს საპარლამენტო დელაგაციაც, რომელსაც საქართველოს პარლამენტის ევროპასთან ინტეგრაციის კომიტეტის თავმჯდომარე, მაკა ბოჭორიშვილი ხელმძღვანელობს.

ევროპარლამენტის პლენარული სესია 8 მარტს გაიხსნა. მუშაობას იგი 11 მარტს დაასრულებს.