მუსიკოსი გიორგი გურეშიძე ამბობს, რომ არასასურველი სიმღერის გამო ბერა ივანიშვილი მასაც დაემუქრა. როგორც მთავარი არხი ამბობს, რვა წლის წინ რამდენიმე მუსიკოსმა სიმღერა რეგრესი დაწერა, სადაც 2012 წლის შემდგომ განვითარებულ მოვლენებს განიხილავდნენ და ბერა ივანიშვილს დახმარებას სთხოვდნენ.

გიორგი გურეშიძის თქმით, მან მუქარის შემცველი ზარი მიიღო ერთ-ერთი რეპერისგან, რომელიც ბერა ივანიშვილის დავალებებს ასრულებდა. იგი დარწმუნებულია, რომ მუქარა ბერა ივანიშვილს უკავშირდება.

"როდესაც ეს რეპერი მესაუბრებოდა, ისე გაბრაზდა ჩემს შეტეულ სიტყვებზე, როცა ვეუბნებოდი, რომ ამას არ წავშლი, არ გავაკეთებ, ბოლოს და ბოლოს რა გინდა დაგალაპარაკოო. მომესმა ტელეფონიდან ხმა, კაი, ბიჭო, რა უნდა დამალაპარაკო, შენ მიხედეო. ეს ვიცი, რომ უეჭველი იყო ბერა ივანიშვილი", — ყვება გურეშიძე.

მუსიკოსი ამბობს, რომ სიმღერის წაშლიდან ერთი კვირის შემდეგ მას სახლთან უცნობი პირები ელოდებოდნენ და მანქანაში ჩასვეს.

"ჩამსვეს მანქანაში და უკნიდან მელაპარაკებოდა ორი ადამიანი, რომელიც მეუბნებოდა ასეთ სიტყვებს, თავს მიხედე, ოჯახს მიხედე და შეეშვი იმას, რაც გააკეთე", — იხსენებს მუსიკოსი.

TV პირველმა 6 მარტს გაავრცელა ჩანაწერები, სადაც, სავარაუდოდ, ირაკლი ღარიბაშვილი, ბერა ივანიშვილი და ანზორ ჩუბინიძე იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში სავარაუდოდ, ირაკლი ღარიბაშვილი და ბერა ივანიშვილი იციანიან. სავარაუდოდ, ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

ჩანაწერებს ქართული ოცნების რამდენიმე ლიდერი გამოეხმაურა. მაგალითად, პარტიის აღმასრულებელმა მდივნის, მამუკა მდინარაძის თქმით, ჩანაწერები 2010 წლისაა და "ფაბრიკაციაა". მოგვიანებით, პარლამენტის თავმჯდომარის პირველმა მოადგილემ, გია ვოლსკიმ განაცხადა, რომ "2011 წელს არის გაკეთებული ჩაწერები, რაღაც ფრაგმენტები ამოღებული და შეკოწიწებული".

ამ დროისთვის უცნობია, ავთენტურია თუ არა ჩანაწერები. ქართული ოცნების რამდენიმე ლიდერმა ჯერ კიდევ გადაცემის ანონსის შემდეგ თქვა, რომ ეს არის "ფაბრიკაცია" და "შეკოწიწებული". თავდაპირველად ჩანაწერის გაკეთების თარიღად მათ 2011 წელი დაასახელეს, შემდეგ კი — 2010. ჩანაწერებს ამ დრომდე არ გამოხმაურებია შინაგან საქმეთა სამინისტრო, მიუხედავად იმისა, რომ ისმის სავარაუდო ძალადობისა და მომავალი ძალადობის გეგმების შესახებ. კომენტარები არ გაუკეთებიათ არც პრემიერმინისტრ ღარიბაშვილსა და ბერა ივანიშვილს.

გაიგეთ მეტი: