ქართული ოცნების დეპუტატის, სოზარ სუბარის განცხადებით, რუსთაველის გამზირზე დღეს გამართული აქცია სასოწარკვეთილი ოპოზიციის სასოწარკვეთილი ნაბიჯი იყო. სუბარმა აქციების ნაცვლად ოპონენტებს საკანონმდებლო ორგანოში შესვლისკენ კიდევ ერთხელ ურჩია.

"დღევანდელი აქცია, დღევანდელი ოპოზიციის ქმედებები, იყო სასოწარკვეთილი ოპოზიციის სასოწარკვეთილი ნაბიჯი. რამ განაპირობა ეს სასოწარკვეთილება, ეს შეიძლება არანაკლებ მნიშვნელოვანი იყოს. ეს არის აბსოლუტურად დაუსაბუთებელი, მათ რეალურ შესაძლებლობებთან შეუსაბამო ამბიცია. ანუ, ამპარტავნება, რომელიც წარმოშობს სასოწარკვეთილებას, რაც ადამიანისთვის დამღუპველია. სასოწარკვეთილებაა ის, რასაც აკეთებენ. მართლა ვერ ვხვდები, რატომ იგდებენ თავს ამ სასოწარკვეთილებაში, რომ არა ეს ფუყე და ფუჭი ამბიცია. მათ მიიღეს ძალიან დიდი მანდატი და შეუძლიათ ქვეყნის სასიკეთო საქმე აკეთონ იქ, სადაც მათ ხალხმა მანდატი მისცა", — განაცხადა სუბარმა პალიტრანიუსის გადაცემაში 360 გრადუსი.

26 თებერვალს რუსთაველის გამზირზე, პარლამენტის შენობის წინ ნაციონალური მოძრაობის თავმჯდომარის, ნიკა მელიას გათავისუფლების მოთხოვნით აქცია გაიმართა. მელიას გათავისუფლების გარდა, ოპოზიციის ლიდერებმა რიგგარეშე არჩევნების დანიშვნისა და ნიკა რურუას გათავისუფლების საკითხი კიდევ ერთხელ დააყენეს.

გაიგეთ მეტი: