გირჩი — მეტი თავისუფლების ლიდერის, ზურაბ ჯაფარიძის განცხადებით, ახალი ბარის გახსნას გეგმავს.

ჯაფარიძემ სამომავლო გეგმებზე პლატფორმა Clubhouse-ის ერთ-ერთ ოთახში On.ge-ს კითხვის პასუხად ისაუბრა.

"პრობლემა მქონდა ის, რომ როდესაც შეცვივდნენ, გამოყარეს ხალხი და დალუქეს, ბარში დარჩა ხალხის პირადი ნივთები და მუსიკალური აპარატურა, რომელიც ნაქირავები გვქონდა და საბოლოო ჯამში, მომიწია ბარტერის გაკეთება საქართველოს პოლიციასთან. ბარტერი იყო ეგეთი, რომ თუ ისინი შემიშვებდნენ ბარში, რომ ხალხს გამოეტანა თავისი პირადი ნივთები და მათ შორის, მუსიკალური აპარატურა გამოგვეტანა, მაშინ პირობას ვაძლევდი, რომ აღარ შევვარდებოდი შიგნით, თუ არა და შევვარდები-მეთქი ყველა შემთხვევაში. ეგ ბარტერი გამიკეთეს და შესაბამისად, ვიცავ. ახლა რაც მინდა გავაკეთო, არის ის, რომ სხვა ლოკაცია მჭირდება, სხვა ხალხი, სხვა სტაფი, სხვა ბარი და მაინტერესებს იქაც თუ მოვლენ", — განაცხადა მან.

გირჩი — მეტი თავისუფლების ლიდერმა, ზურაბ ჯაფარიძემ აღმაშენებლის გამზირზე ბარი გახსნა. მისი თქმით, ამ ფორმით ქვეყანაში დაწესებულ შეზღუდვებს აპროტესტებს. ჯაფარიძემ აღნიშნა, რომ აპირებს ბარი სხვა დღეებშიც ამუშაოს და მხოლოდ იმ შემთხვევაში დაიკეტება, თუ მას დააკავებენ.

მისი თქმით, ეს არის პოლიტიკური დაუმორჩილებლობის აქტი და არღვევს იმ რეგულაციებს, რომლებიც, მისი აზრით, არაკონსტიტუციურია და ადამიანებს წაართვა სიცოცხლის უფლება.

ამ ეტაპისთვის თბილისში ბარ-რესტორნების მუშაობა კვლავ აკრძალულია. რესტორნებისთვის ღია სივრცეში მუშაობა მხოლოდ 15 თებერვლიდან იქნება ნებადართული, შაბათ-კვირის და კომენდანტის საათის გამოკლებით.

მიუხედავად იმისა, რომ შეზღუდვების ნაწილი იხსნება, სხვადასხვა ბიზნესის წარმომადგენლები აცხადებენ, რომ ეს არასაკმარისია და მკაცრი რეგულაციების ფარგლებში შეზღუდვების მოხსნას ითხოვენ. აღნიშნული მოთხოვნებით თბილისში არაერთი აქცია ჩატარდა.

13 თებერვალს ზურაბ ჯაფარიძე ბარის გახსნისთვის 2 000 ლარით დააჯარიმეს. განმეორების შემთხვევაში, მას სისხლისსამართლებრივი პასუხისმგებლობა დაეკისრება. ადგილზე შრომის ინსპექცია, მუნიციპალური ინსპექცია და პოლიცია იყვნენ მისულები.

14 თებერვალს ჯაფარიძის ბარში შრომის ინსპექცია ისევ მივიდა. მათ განაცხადეს, რომ დააფიქსირეს "არანებადართული ეკონომიკური საქმიანობის" განმეორება, რისი ამსახველი მასალებიც შსს-ს გაეგზავნება.

მოგვიანებით ადგილზე შინაგან საქმეთა სამინისტროს წარმომადგენლები მივიდნენ, მოქალაქეებს შენობა დაატოვებინეს, შემდეგ ბარი დალუქეს და ორი ადამიანი გამოსაკითხად წაიყვანეს.

15 თებერვალს ზურაბ ჯაფარიძე პოლიციის მიერ დალუქული ბარი გასახსნელად მივიდა, თუმცა პოლიცია მას ამის საშუალებას არ აძლევს და მოუწოდებს, რომ კანონის შესაბამისად იმოქმედოს.

"ჩემს ბარში მინდა შესვლა, მინდა, ლუქი ავაძრო. მე მგონია, პოლიციის საქმეა, რომ მე თუ ლუქს ავაძრობ, შემდეგ მოახდინონ გარკვეული რეაგირება. ახლა კი ფიზიკურად დადგნენ და მეუბნებინ, რომ მიცავენ, შემთხვევით კანონი რომ არ შემომერღვეს. ამ დროს მოსული ვარ, რომ კანონი დავარღვიო", — ამბობს ჯაფარიძე.</p