საქართველოს პრეზიდენტის ადმინისტრაციის შენობასთან სტიკერის გაკვრას აქტივისტებსა და პოლიციას შორის დაპირისპირება მოჰყვა. მათ სალომე ზურაბიშვილის რეზიდენციას რუსეთის ფედერაციის პრეზიდენტის, ვლადიმერ პუტინის სტიკერი გააკრეს. ატივისტების თქმით, "სალომე ზურაბიშვილი ქართული ოცნების რუსული პროექტია".

აქციის მონაწილეს იდენტიფიცირებისთვის პირადობის მოწმობის წარდგენა სთხოვეს. სამოქალაქო აქტივისტის, ნოდარ რუხაძის განცხადებით, პრეზიდენტის ადმინისტრაციასთან იმის სათქმელად შეიკრიბნენ, რომ გიორგი რურუა პოლიტპატიმარია.

"მათ აიღეს პასუხისმგებლობა, რომ 8 მარტის შეთანხმებით ქვეყანაში პოლიტპატიმრები უნდა გათავისუფლებულიყვნენ. ახლა ბიძინა ივანიშვილის მიერ დანიშნულ სალომე ზურაბიშვილს ვეუბნებით, რომ მას შეუძლია პოლიტიკური კრიზისის განმუხტისთვის გადადგას პირველი ნაბიჯი და გიორგი რურუა გაათავისუფლოს", — ამბობს ნოდარ რუხაძე პალიტრანიუსთან.

On.ge შინაგან საქმეთა სამინისტროს დაუკავშირდა იმის გასარკვევად, დაჯარიმდა თუ არა აქტივისტი სტიკერის გაკვრის გამო. მათ პასუხს მიღებისთანავე შემოგთავაზებთ.