ნაციონალური მოძრაობის თავმჯდომარის, ნიკა მელიას განცხადებით, პროკურატურა და სასამართლო არა მას, არამედ თავისუფლების იდეას ასამართლებს. მისი თქმით, ეს არის იმ ადამიანების გასამართლებაც, ვინც 20 ივნისს რუსი კომუნისტი დეპუტატის, სერგეი გავრილოვის ვიზიტი გააპროტესტა.

"ვადა ამოიწურა, მე უკანონო, უსამართლო გირაო არ გადავიხადე და არც გადავიხდი. იმიტომ, რომ როგორც არასოდეს ვარ მართალი, ჩემს მეგობრებთან და 100 ათასობით საქართველოს მოქალაქესთან ერთად. ჩემი გასამართლებით თქვენ ნიკა მელიას კი არა, თავისუფლების იდეას ასამართლებთ, მცდელობა გაქვთ თავიუსფლების იდეის გასამართლების. იმ ადამიანებს ასამართლებთ, ვინც გაბედა, გამოვიდა და 20 ივნისს გითხრათ, რომ რატომ ჩასვი მტერი სახელმწიფოს ყველაზე აგრესიული ერთ-ერთი წარმომადგენელი პარლამენტის თავმჯდომარის სავარძელში", — განაცხადა მან ბრიფინგზე.

მელია ამბობს, რომ არასდროს არ ყოფილა ასე ამაყი და ძლიერი, იმდენად, რომ "ტყვიაც რომ ესროლონ, მკერდით გააჩერებს", რადგან მის უკან არის ზნეობა, მორალი, სიმართლე და ქვეყნის სიყვარული.

"ვაღიარებ, მინდა, რომ ამ ჩემი ქმედებით გავწყვიტო უკანონობის, უსამართლობის, შავზე თეთრის თქმის, დაცინვის, აბუჩად აგდების ჯაჭვი. ეს ნამდვილად მინდა. ნამდვილად მინდა, მთელმა საერთაშორისო საზოგადოებამ გაიგოს, რომ შენი მტერი როცა შემოყავს ხელისუფლებას, დიდი პატივით მიიღებს, ამის შემდეგ თვალებს გბდღვნის, ამის შემდეგ პოლიტიკურად მოტივირებული სასამართლო შენს მეგობრებს, შენს ახალგაზრდა, გამოცდილ მეგობრებს დევნის, ამას თავს მე ვეღარ დავუხრი. პუტინის რუსეთშიც არსებობს სასამართლო, პროკურატურა, პარლამენტი, მაგრამ ის არ არის ხალხის სამსახურში", — განაცხადა მელიამ ბრიფინგზე.

ნიკა მელიას დაკავებისთვის გენერალურმა პროკურატურამ პარლამენტს მიმართა. იმის გამო, რომ მელია ოფიციალურად პარლამენტის დეპუტატია, მას იმუნიტეტი იცავს. გენერალურ პროკურატურას მელიასთვის იმუნიტეტის მოხსნა სჭირდება იმისთვის, რომ სასამართლოს პატიმრობის შუამდგომლობით მიმართოს. იმუნიტეტის მოხსნი საკითხი კი პარლამენტის პლენარულ სხდომაზე უნდა გადაწყდეს.

5 თებერვალს, გენერალურ პროკურატურაში განაცხადეს, რომ ნიკა მელიას აღკვეთის ღონისძიების, გირაოს პირობების შესრულებისთვის ერთკვირიან ვადას აძლევენ. თანხის გადაუხდელობის შემთხვევაში პროკურატურა სასამართლოს აღკვეთის ღონისძიების პატიმრობით შეცვლის თაობაზე მიმართავდა.

ვადა დღეს ამოიწურა. მელია აცხადებს, რომ პროკურატურის მიერ მოთხოვნილ გირაოს არ გადაიხდის და სხვასაც უკრძალავს მისთვის თანხის შეგროვებას.

ამავე საქმეზე ნიკა მელიასთვის იმუნიტეტის შეწყვეტა პროკურატურამ 2019 წლის ივნისშიც მიმართა. მაშინ პარლამენტმა მხარი დაუჭირა მელიასთვის იმუნიტეტის მოხსნას და პროკურატურას მისი დაკავების უფლება თუმცა სასამართლომ მას პატიმრობის ნაცვლად გირაო შეუფარდა.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება.

2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

• საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
• საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
• დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

2020 წლის 1 ნოემბერს არჩევნებთან დაკავშირებულ საპროტესტო აქციაზე მელიამ ელექტრონული მონიტორინგისთვის განკუთვნილი სამაჯური მოიხსნა და განაცხადა რომ მას აღარ გაიკეთებდა.

ამის შემდეგ, პროკურატურამ აღკვეთის ღონისძიების გამკაცრება, კერძოდ, გირაოს გაზრდა 100 ათას ლარამდე მოითხოვა. თბილისის საქალაქო სასამართლოს 2020 წლის 3 ნოემბრის განჩინებით, მელიას მიმართ მანამდე გამოყენებული აღკვეთის ღონისძიება გამკაცრდა და გირაოს ოდენობად 70 ათასი ლარი შეეფარდა.