აჭარაში, იმ ადგილას, სადაც ბიძინა ივანიშვილის ხის ტრანსპორტირებისას მაგისტრალი დაიკეტა, ენმ-ის 2 წევრი დააკავეს - უმაღლესი საბჭოს დეპუტატი, ელგუჯა ბაგრატიონი და ქობულეთის საკრებულოს წევრი ბონდო თედორაძე. ენმ-ის პრესსამსახურის ცნობით, როცა საცობი შეიქმნა, მათ [ბაგრატიონმა და თედორაძემ] გადამზიდ ფირმას საბუთები მოსთხოვეს და პოლიციამ მაშინ დააკავა.

ფოტოზე: ბონდო თედორაძე დაკავებისას.

ფოტო: ლია მგელაძე / Facebook

შსს-ს პრესსამსახურის ინფორმაციით კი, უწყება ორ ადამიანს დაუმორჩილებლობაში სდებს ბრალს:

"არ ვიცი ვინები არიან. ორი ადამიანია დაკავებული, სავალი ნაწილი ჰქონდათ გზის გადაკეტილი და არ დაემორჩილნენ პოლიციის კანონიერ მოთხოვნას გზის გახსნასთან დაკავშირებით."

შსს-ს ცნობით, დაკავება ადმინისტრაციულ სამართლადარღვევათა კოდექსის 173-ე მუხლით მოხდა, რაც პოლიციელის კანონიერი განკარგულებისადმი ან მოთხოვნისადმი დაუმორჩილებლობას, ან ამ პირის მიმართ სხვა კანონსაწინააღმდეგო ქმედების განხორციელებას გულისხმობს. აღნიშნული დარღვევა ითვალისწინებს დაჯარიმებას 250 ლარიდან 2000 ლარამდე ან ადმინისტრაციულ პატიმრობას 15 დღემდე ვადით.