ევროპული საქართველოს ერთ-ერთი წვერი, ირმა ნადირაშვილი, მიმართავს ადამიანებს, ვინც ცენტრალური საარჩევნო კომისიის თავმჯდომარეს, თამარ ჟვანიას სიმბოლურად შუბლის ძარღვის იმპლანტი აჩუქეს და სთავაზობს, იგივე საჩუქარი პარტია მოქალაქეების ლიდერს, ალეკო ელისაშვილს მიუტანონ. ასე შეაფასა ნადირაშვილმა ელისაშვილის განცხადება იმის შესახებ, რომ ივერი მელაშვილისა და ნატალია ილიჩოვას გირაოს სანაცვლოდ გათავისუფლება ქართულ ოცნებასთან მოლაპარაკების შედეგია.

"ივერი მელაშვილმაც თქვა, რომ თუ ელისაშვილიც მის ხარჯზე აპირებს პარლამენტში შესვლას, ამის ნაცვლად ის მზად არის, რომ უკან დაბრუნდეს ციხეში, მეტი რაღა უნდა თქვას ამ ადამიანმა. თუ ელისაშვილმა აქედანაც ვერ გააკეთა დასკვნა, ამ ფულის შეგროვების ამაღელვებელი ფაქტიდან და მელაშვილის ამ განცხადებიდან, მაშინ მე უბრალოდ ვთავაზობ იმ ადამიანებს, ვინც თავის დროზე შუბლის ძარღვის იმპლანტი მიუტანა თამარ ჟვანიას, მას მაინც არ გამოადგა არაფერში და მე ვთავაზობ, რომ ეს იმპლანტი ელისაშვილს წაუღონ", — განაცხადა ირმა ნადირაშვილმა.

რაც შეეხება პარტია მოქალაქეების გადაწყვეტილებას პარლამენტში შესვლის შესახებ, ირმა ნადირაშვილი ამბობს, რომ ელისაშვილი მისთვის ქართული ოცნების წევრია.

"ჩემთვის ალეკო ელისაშვილი ქართული ოცნების წევრია, ამიტომ, კომენტარების გაკეთება ალბათ ზედმეტია, რადგან რამდენჯერ, ვთქვათ, არჩილ თალაკვაძე და დიმიტრი ხუნდაძე ერთმანეთს ნახულობენ, ჩვენ ამაზე კომენტარს არ ვაკეთებთ. ქართული ოცნება შიგნით ვის შეხვდება, ეს ჩვენი საქმე არ არის", — განაცხადა ირმა ნადირაშვილმა.

კარტოგრაფების საქმეზე ბრალდებული ივერი მელაშვილი და ნატალია ილიჩოვა გირაოს სანაცვლოდ გუშინ გაათავისუფლეს. გუშინვე, მოძრაობა #სირცხვილია მათთვის გირაოს თანხის შეგროვება გადაწყვიტა. ანგარიშის დადებიდან 2 საათში, გირაოს თანხა, 40 000 ლარი სრულად შეგროვდა.

გუშინვე, პარტია ალეკო ელისაშვილმა განაცხადა, რომ მათი გათავისუფლება ყველაფერს ცვლის, რადგან ეს მისი ერთ-ერთი მთავარი მოთხოვნა იყო პარლამენტში შესასვლელად. დღეს ცნობილი გახდა, რომ პარტია მოქალაქეების ლიდერები, ალეკო ელისაშვილი და ლევან იოსელიანმა პარლამენტში შესვლა გადაწყვიტეს.

სწორედ მოძრაობა #სირცხვილიას პერფორმანსი იყო ცესკოს თავმჯდომარის, თამარ ჟვანიასთვის საჩუქრების მიტანა, რომელთა შორისაც შუბლის ძარღვის იმპლანტიც იყო. ასე გააპროტესტეს #სირცხვილიას წევრებმა 2020 წლის საპარლამენტო არჩევნების შედეგები.