საქართველოს პროკურატურის განცხადებით, უზენაესი სასამართლოს მოსამართლეების განცხადებებისა და სასამართლოს თავმჯდომარის მომართვის შედეგად, მოსამართლეების მიერ პროკურატურაში წარდგენილ წერილებში იკვეთებოდა მათ საქმიანობაში უხეში ჩარევის მცდელობის ნიშნები:

"მოსამართლეებმა, ყოფილი ხელისუფლების თანამდებობის პირის სახელით საცხოვრებელ მისამართებზე მიიღეს წერილობითი მიმართვები, ასევე მობილურ ტელეფონებზე - უცხოური მობილური ტელეფონის ნომრიდან მოკლე ტექსტური შეტყობინებები. ხსენებული მოსამართლეებისთვის გაგზავნილ წერილობით შეტყობინებებში, რომლებიც მოსამართლეებმა წარმოადგინეს საქართველოს მთავარ პროკურატურაში, იკვეთებოდა მათ საქმიანობაში უხეში ჩარევის მცდელობის ნიშნები." - აღნიშნულია განცხადებაში.

უწყების ცნობით, საგამოძიებო სამუშაოები ინტენსიურ რეჟიმში მიმდინარეობს და გამოძიების სხვა დეტალებზე გამოძიების ინტერესების გათვალისწინებით ამ ეტაპზე პროკურატურა ვერ ისაუბრებს.

დღესვე რუსთავი 2-ის გენერალურმა დირექტორმა მოითხოვა პროკურატურისგან, რომ გამოქვეყნდეს მოსამართლეების განცხადების შინაარსი, რომლითაც უზენაესი სასამართლოს მოსამართლეებმა, მათზე შესაძლო ზეწოლის გამო, პროკურატურას მიმართეს.

გუშინ, 2 თებერვალს, ცნობილი გახდა, რომ 2017 წლის 14 იანვარს, უზენაესი სასამართლოს მოსამართლეების, ბესარიონ ალავიძისა და პაატა ქათამაძის განცხადებისა და სასამართლოს მომართვის საფუძველზე დაიწყო გამოძიება. უზენაესი სასამართლოს ორი მოსამართლე პროკურატურას მათზე შესაძლო ზეწოლის ფაქტების გამოძიებას სთხოვს.