ლელო საქართველოსთვის ერთ-ერთი ლიდერის, მამუკა ხაზარაძის განცხადებით, დღეს, 25 იანვარს ლელოს ოფისში ყველა ის პარტია იყო შეკრებილი, ვინც მანდატების გაუქმებაზე განცხადება დაწერა. ხაზარაძის თქმით, ოპოზიციური პარტიების შეხვედრაზე ერთ-ერთ საკითხად გირჩთან მოლაპარაკებების გაგრძელებაც განიხილეს, რომელსაც ჯერ მანდატების გაუქმებაზე განცხადება დაწერილი არ აქვს.

"გირჩს არ აქვს დაწერილი განცხადება მანდატების გაუქმებაზე და სწორედ ერთ-ერთ ამ საკითხზე ვმსჯელობდით, რომ გავაგრძელოთ გირჩთან მოლაპარაკებები. მე მათი მჯერა, როცა ისინი ამბობენ, რომ არ შევლენ პარლამენტში. სხვა იქ არაფერი განხილულა. მოვისმინე, რომ ვიღაცამ გარიცხა, თუ გამორიცხა, რა სისულელეა. მინდა ყველას ვუთხრა, რომ არც სკოლის კლასის დამრიგებლები ვართ და არც რაღაც კლუბი გვაქვს. კონკურენტი პარტიები ვსხედვართ იქ და ვართ გაერთიანებული გაყალბებული არჩევნების გარშემო, თორემ კიდევ ვიმეორებ, აბსოლუტურად სხვადასხვანაირი ხედვა გვაქვს უამრავ საკითხზე. ამიტომ იქ არც უფროსია, არც სკოლისა და კლასის დამრიგებელი, არც არავის რიცხავენ და არც არავის იღებენ. ყველა პარტია იღებს დამოუკიდებლად თავის გადაწყვეტილებას", — განაცხადა ხაზარაძემ პალიტრანიუსის ეთერში.

მისივე თქმით, პარტიების წარმომადგენლებმა კიდევ ერთხელ უთხრეს ერთმანეთს, რომ ისევ იმ პოზიციაზე დგანან, რომ არაფერი შეცვლილა და არიან პრინციპულები.

მანდატების გაუქმების მოთხოვნით პარლამენტისთვის პარტია მოქალაქეებსა და გირჩს, ჯერჯერობით, არ მიუმართავს.