IDFI 2015 წელსა და 2016 წლის 1-ელ კვარტალში ჩატარებული მონიტორინგის შედეგებს აქვეყნებს, საიდანაც ჩანს, რომ სავალდებულო პროაქტიულად გამოქვეყნებული ინფორმაციის რაოდენობით ყველაზე დაბალი მაჩვენებელი მთავრობის ადმინისტრაციას (47%), გარემოსა და ბუნებრივი რესურსების სამინისტროს (50%), საგარეო საქმეთა სამინისტროსა (52%) და სოფლის მეურნეობის სამინისტროს (52%) აქვთ:

"2014 წელთან შედარებით საკუთარი მაჩვენებელი ყველაზე მეტად გააუარესეს საქართველოს მთავრობის ადმინისტრაციამ (-53 %) და გარემოს დაცვის სამინისტრომ (-40%)".

ორგანიზაციის განმარტებით, მთავრობის ადმინისტრაციის მაჩვენებლის გაუარესება განაპირობა იმან, რომ 2014 წლის ნოემბრის შემდეგ, მის ვებ საიტზე ფინანსური და სხვა ინფორმაციის უდიდესი ნაწილი აღარ განუახლებიათ.

რაც შეეხება სავალდებულოდ გამოსაქვეყნებელი ინფორმაციის ყველაზე მაღალ მაჩვენებელს, ამ მხრივ 4 სამინისტრო ლიდერობს, რომელთა მაჩვენებელი 100%-ია. ესენია: განათლებისა სამინისტრო, ენერგეტიკის სამინისტრო, სასჯელაღსრულებისა სამინისტრო და რეგიონული განვითარებისა და ინფრასტრუქტურის სამინისტრო.

ასევე მაღალი მაჩვენებელი აქვს ლტოლვილთა სამინისტროს (98%), სპორტის სამინისტროს (93%), იუსტიციის სამინისტროსა (92%) და ფინანსთა სამინისტროს (89%).

ორგანიზაცია განმარტავს, რომ 2014 წლის ანალოგიურ მაჩვენებელთან შედარებით, საქართველოს მთავრობის ადმინისტრაციისა და 16 სამინისტროს პროაქტიული გამოქვეყნების საშუალო მაჩვენებელმა დაახლოებით 3%-ით იკლო და 79,2% შეადგინა:

"მიუხედავად, იმისა რომ აღნიშნული უწყებების საშუალო პროცენტული მაჩვენებელი მნიშვნელოვნად არ შეცვლილა, განსხვავებულ სურათს ვხვდებით კონკრეტული დაწესებულებების მაგალითზე".

IDFI ასკვნის, რომ მთავრობის ადმინისტრაცია და სამინისტროების უმრავლესობა სათანადოდ არ ცდილობენ უზრუნველყონ საკუთარი ფინანსური გამჭვირვალობა და საზოგადოებისთვის სხვა მნიშვნელოვანი ინფორმაციის პროაქტიული ხელმისაწვდომობა.