მანანა კობახიძე საქართველოს პარლამენტის წევრი 2016 წელს მეორე ვადით გახდა. რამდენიმე დღის წინ ის საპარლამენტო უმრავლესობამ - ქართულმა ოცნებამ საკონსტიტუციო სასამართლოს მოსამართლის ვაკანტურ თანამდებობაზე დაასახელეს. მოსამართლედ არჩევამდე, კობახიძე პარლამენტის წევრად რჩება. სწორედ ამ სტატუსით შეავსო მან დეკლარაცია 2017 წლის 18 იანვარს.

დეკლარაციის მიხედვით, დეპუტატს ჰყავს მეუღლე - ზაზა გოგიჩაიშვილი და შვილები: ნინო და მაკა ორაგველიძეები. კობახიძეს თბილისში ორი ბინა ეკუთვნის - 1994 წელს აბაშიძის ქუჩაზე 25 ათას ამერიკულ დოლარად შეძენილი 95,56 მ2 ბინა და 2012 წელს 130 ათას ამერიკულ დოლარად ბერბუკის ქუჩაზე შეძენილი 180 მ2 ფართის ბინა. უძრავი ქონება მისი ოჯახის კიდევ ერთ წევრს, მაკა ორაგველიძეს ეკუთვნის. ორაგველიძემ 2016 წელს თბილისში, ტაბახმელაში ათასი კვადრატული მეტრი მიწის ნაკვეთი იყიდა. მოძრავი ქონება მხოლოდ დეპუტატის მეუღლეს ეკუთვნის. გოგიჩაიშვილმა 2016 წელს 13 ათას ამერიკულ დოლარად მსუბუქი ავტომანქანა KIA Sportage იყიდა.

რაც შეეხება ფინანსურ მდგომარეობას, მანანა კობახიძემ 2016 წელს პარლამენტის წევრად მუშაობის დროს 74 939 ლარი გამოიმუშავა. დეკლარაციის შევსების მომენტისთვის, მის ანგარიშზე 135 ამერიკული დოლარი იყო, მისი ქმრის ანგარიშზე - 1 500 ლარი და შვილის ანგარიშზე - 100 ლარი.

დეპუტატმა და მისმა ქმარმა 2016 წელს ბანკიდან სესხი აიღეს. ზაზა გოგიჩაიშილის კრედიტი 10 ათასი ამერიკული დოლარია, მანანა კობახიძის კი - 13 ათასი ლარი.