თბილისის მერი, კახა კალაძე, პანდემიის დროს, ვარკეთილის მეტროს ჩამონგრევიდან მეორე წელს, ისევ დიზაინერს ეძებს. კალაძე დიზაინერებს დახმარებისკენ მოუწოდებს. მან ამის შესახებ მთავრობის სხდომაზე განაცხადა.

"ვარკეთილის მეტრო სერიოზულ პრობლემას წარმოადგენს და ამ ხნის განმავლობაში ვერანაირად მოხერხდა დიზაინის შერჩევა. ჩვენ გვყავდა გამარჯვებული კომპანია, მაგრამ მათი დიზაინი დაწუნებული იქნა. მინდა ვთხოვო და მოვუწოდო დარგის სპეციალისტებს, დიზაინერებს, ვისაც აქვს სურვილი, დაგვეხმაროს ამ კონკრეტული პროექტის განხორციელებაში, დაგვეხმარონ დიზაინის გაკეთებაში, ვიცი რომ თბილისს ძალიან ბევრი გულშემატკივარი ჰყავს", — განაცხადა კალაძემ.

ვარკეთილის მეტროსადგურში ჭერი 2018 წლის 30 იანვარს ჩამონგრა. შედეგად, 14 ადამიანი დაშავდა. სადგურის გარემონტება ყოფილი მერის, დავით ნარმანიას მმართველობის პერიოდში 347 848 ლარი დაჯდა. სამუშაოების ხარისხის დასადგენად On.ge თბილისის სატრანსპორტო კომპანიისგან და თბილისის მერიისგან ვარკეთილისა და ახმეტელის მეტროსადგურებში ჩატარებულ რემონტზე ექსპერტული დასკვნები გამოითხოვა. ამ დასკვნებში უნდა იყოს ასახული რა ღირებულების მოცულობითი სამუშაოები შეასრულეს ტენდერში გამარჯვებულმა კომპანიებმა და რამდენად სწორად გადაიხადა თბილისის სატრანსპორტო კომპანიამ თანხა.

თბილისის საქალაქო სასამართლოში On.ge-ს ამ ინფორმაციის მისაღებად ორი სასამართლო დავა ჰქონდა. სასამართლომ როგორც თბილისის სატრანსპორტო კომპანიას, ისე თბილისის მერიას ინფორმაციის გადმოცემა დაავალა. მერიმაც და კომპანიამაც სასამართლოს გადაწყვეტილება გაასაჩივრეს. კომპანიის არგუმენტია, რომ ეს ინფორმაცია საჯარო არ არის და მისი გაცემის ვალდებულება არ აქვს, თუმცა სააპელაციო სასამართლომ გადაწყვეტილება ძალაში დატოვა. მიუხედავად ამისა, On.ge-სთვის ინფორმაცია ამ დრომდე არ მიუწოდებიათ.

ინციდენტთან დაკავშირებით გამოძიება სამთო, სამშენებლო ან სხვა სამუშაოს წარმოებისას უსაფრთხოების წესის დარღვევის ფაქტზე, სსკ-ის 240-ე მუხლით მიმდინარეობს.