2016 წელი HBO-სთვის საკმაოდ წარმატებული აღმოჩნდა, სხვა ყველაფერს რომ თავი დავანებოთ, სწორედ წელს დაიწყო კომპანიამ ბოლო დროის ერთ-ერთი ყველაზე წარმატებული სერიალი Westworld, რომელმაც სატელევიზიო შოუების ყველა წამყვანი დაჯილდოების პრიზი ან ნომინაცია მაინც მიიღო.

აღსანიშნავია ისიც, რომ სერიალის პირველი სეზონი HBO-ს ისტორიაში შევიდა, როგორც შოუების ყველაზე ყურებადი პირველი სეზონი არხის არსებობის განმავლობაში.

სერიალის შემქმნელები ჯონათან ნოლანი და ლიზა ჯოი კი 2017 წლის Writers Guild Award-ზე, საუკეთესო სცენარისტების კატეგორიაში არიან ნომინირებულები და სავარაუდოდ ამ ჯილდოს მიიღებენ კიდევაც.

Westworld-ის ფინალური სერია ეთერში 4 დეკემბერს გავიდა, გულშემატკივრები კი დიდი მოლოდინით ელიან ახალი სეზონის დაწყებას, თუმცა როგორც გაირკვა, HBO ბრწყინვალე სერიალს მხოლოდ და მხოლოდ 2018 წელს დააბრუნებს ეკრანზე, ამის მიზეზი კი გადაღებების დროს წარმოქმნილი სირთულეებია.

"ეთერში 2018 წლამდე არ ვიქნებით. პირველი სეზონის მეორე ეპიზოდის გადაღებისას დავიწყეთ ქსელთან [HBO] მოლაპარაკება და მივხვდით, რამდენად რთულია ერთდროულად წერდე, აკეთებდე შოუს და მის გადაღებებსაც აწარმოებდე. ჩვენ ორივე [იგულისხმება შოუს შემქმნელები ჯონათან ნოლანი და ლიზა ჯოი] ვმუშაობთ კინოს ბიზნესშიც და საუკეთესო რამ, რისი იმედიც ფრენჩაიზზე მუშაობის დროს შეიძლება გქონდეს, არის ორ ან სამ წელიწადში სხვა ნაწილის გადაღება. ასე რომ, ამ ახალი განრიგის მიხედვით, ჩვენი საქმე დიდებულად არის." - ამბობს შოუს ერთ-ერთი შემქმნელი ჯონათან ნოლანი Variety-სთან ინტერვიუში.

კითხვაზე, თუ რას უნდა ველოდეთ შოუს მეორე სეზონისგან ლიზა ჯოი პასუხობს, რომ ახალი ნაწილი ძალიან საინტერესო და ამბიციურია.

"ჩვენ დავიწყეთ უკვე მეორე სეზონზე მუშაობა, რომელიც საკმაოდ ამბიციურია და სადაც მაყურებელს საკმაოდ ბევრი სიურპრიზი ელის. კარგად გავერთობით, მადლობა HBO-ს ასეთი შესაძლებლობებისთვის" - ამბობს ინტერვიუში ლიზა.

აღსანიშნავია ისიც, რომ სცენარისტებმა სერიალ დაკარგულების პრაქტიკა გამოიყენეს და მსახიობებს მხოლოდ გადაღების წინ აძლევდნენ სცენარს.

"მე და ლიზა მსახიობებს გადაღებების დროს ვაწვდიდით ინფორმაციას პერსონაჟების შესახებ, რადგან ამბავი რაც შეიძლება სუფთა და ნამდვილი ყოფილიყო. ზოგჯერ უფრო შორს წასვლაა საჭირო, რათა მსახიობი სათანადოდ იყოს აღჭურვილი." - ამბობს ნოლანი.

სტატიის შემდეგი ნაწილი შეიცავს სპიოლერს და თუ შოუ ჯერ არ გინახავთ გირჩევთ შეწყვიტოთ კითხვა.

სერიალის შემქმნელებმა ისაუბრეს ენტონი ჰოპკინსზე და მის პერსონაჟ რობერტ ფორდზეც.

"ენტონი ჰოპკინსთან მუშაობა ჩემი და ლიზას კარიერაში ერთ-ერთი ყველაზე დიდი პრივილეგია იყო რაც კი აქამდე გვქონია, ეს იყო არაჩვეულებრივი გამოცდილება. მართალია ფორდი მკვდარია, მაგრამ ვნახოთ როგორ გაგრძელდება ჩვენი ისტორია" - ამბობს ნოლანი.

"რადგანაც სეზონის უმეტესი ნაწილი ფორდის განზრახვასა და მის გეგმაზე იყო ორიენტირებული, მე და ლიზამ გადავწყვიტეთ, ენტონი ჰოპკინსს თავიდანვე მიეღო მონაწილეობა საუბარში, სადაც განვიხილავდით, თუ როგორი იქნებოდა მისი სცენები ფინალურ სერიაში, რომელიც საბოლოოდ უნდა ყოფილიყო პროლოგი კიდევ უფრო დიდი ამბის დაწყების წინ, რომელსაც ჩვენ ვყვებით. ამ ნარატივში ფორდი ღმერთია, ღმერთის სიკვდილი კი ჩვენი ამბის დასაწყისია" - თქვა ინტერვიუს დროს ლიზამ.