ევროპული საქართველოს ლიდერის, სერგი კაპანაძის თქმით, მან არ იცის რა მოლაპარაკებების ჩაშლაზე საუბრობდა ნაციონალური მოძრაობის თავმჯდომარე, გრიგოლ ვაშაძე. მისთვის სამწუხაროა, რომ კეთდება განცხადებები, რომელიც გაუგებრობებს იწვევს.

"რა მოლაპარაკებები ჩაიშალა, ჩვენ არ ვიცით, არც ევროპულმა საქართველომ და არც სხვა რომელიმე ოპოზიციურმა პარტიამ. ამიტომ თუ ამას განმარტებას მოაყოლებს ბატონი გრიგოლი, იქნება უკეთესი, რადგან მე არ ვიცი, რა მოლაპარაკებები ჩაიშალა. მოლაპარაკებები ჯერ არ დაწყებულა, ამიტომ ის რაც არ დაწყებულა, როგორ ჩაიშალა, ჩემთვის არის გაუგებარი", — ამბობს სერგი კაპანაძე.

გრიგოლ ვაშაძემ 11 ნოემბერს განაცხადა, რომ მმართველ გუნდთან ოპოზიციის "თითქმის მომზადებული" მოლაპარაკებები ჩაიშალა. ასე უპასუხა მან კითხვას, რითი იყო განპირობებული მისი განცხადება, რამაც ორაზროვნება გამოიწვია. მან არ დაასახელა დიპლომატები, რომლებიც ჩართული იყვნენ მოლაპარაკებებში და აღნიშნა, რომ ამის ნებართვა არ აქვს. თუმცა, მისი თქმით, მათთან ყოველდღიური კომუნიკაცია ჰქონდა.

10 ნოემბერს გავრცელდა ენმ-ის თავმჯდომარის, გრიგოლ ვაშაძის განცხადება, სადაც ის პოლიტიკურ პარტიებს მოუწოდებდა, პროცესი მშვიდობიან მაგიდასთან გადაიტანონ და ჩაანაცვლონ ქუჩა ყველა დონის საკანონმდებლო ორგანოების ტრიბუნით. განცხადებას კრიტიკა მოჰყვა ოპოზიციაში, მათ შორის, ენმ-შიც.

ვაშაძემ თავის განცხადებაზე დამატებითი განმარტებები გაავრცელა. მან Facebook-ზე დაწერა, რომ პროტესტი უნდა გაგრძელდეს, მაგრამ დაემატოს პოლიტიკური კომპონენტი.