პანდემიის დროს სამივლინებო ხარჯების გამო კრიტიკის პასუხად, სალომე ზურაბიშვილი ქვეყნის სხვა პრეზიდენტების ხარჯებს აქვეყნებს. ზურაბიშვილის ოფიციალური გვერდი მიხედვით, მისი ვიზიტების ხარჯების შესახებ ინფორმაცია "დისკრედიტაციის მიზნით" გავრცელდა.

"საზოგადოებამ თავად შეადაროს ციფრები და გააკეთოს დასკვნები", — აღნიშნულია ზურაბიშვილის ოფიციალურ Facebook გვერდზე.

პრეზიდენტი მისი წინამორბედების ხარჯებს ლარის იმდროინდელი კურსის მითითებით აქვეყნებს.

ამ ინფორმაციით, საქართველოს პრეზიდენტების 9 თვის სამივლინებო ხარჯებია:

  • მიხეილ სააკაშვილი (2012 წელი) — 2 558 799 ლარი (იმდროინდელი გაცვლითი კურსით (კურსი1.6) 1,599,249 დოლარი);
  • გიორგი მარგველაშვილი (2016 წელი) — 1 991 954 ლარი (იმდროინდელი გაცვლითი კურსით (2.1) 948 549 დოლარი);
  • სალომე ზურაბიშვილი (2019 წელი) — 1 335 569 ლარი (იმდროინდელი გაცვლითი კურსით (2.6) 513 680 დოლარი.

"აღნიშნული ნიშნავს, რომ პრეზიდენტ სააკაშვილის მივლინების ხარჯი დაახლოებით 3-ჯერ მეტი იყო, ხოლო პრეზიდენტ მარგველაშვილის ორჯერ მეტი, ვიდრე დღევანდელი პრეზიდენტისა. საყურადღებოა, რომ პრეზიდენტ სალომე ზურაბიშვილს არ აქვს სარეზერვო ფონდი, რომელიც 2019 წლიდან განულდა და 2013-2018 წლებში წლიურად 5 მილიონს, ხოლო 2013 წლამდე პერიოდში 50 მილიონ ლარს შეადგენდა", — აცხადებს ზურაბიშვილი.

რაც შეეხება 2020 წლის მივლინებებს უცხოეთში, პრეზიდენტი აღნიშნავს, რომ პანდემიიდან გამომდინარე პრაქტიკულად ყველა გაუქმდა.

"წლის დასაწყისში შედგა მხოლოდ ორი ვიზიტი, ევროპის საბჭოსა (სტრასბურგი) და ისრაელში. ხოლო, ყველა დანარჩენი ვიზიტი განხორციელდა შიდა ტურიზმის პოპულარიზაციისათვის! პანდემიის ფართოდ გავრცელების დროიდან, მე-9 თვის ჩათვლით დაიხარჯა 21 000 ლარი. რეგიონებში მივლინებების დროს ბევრი სხვადასხვა ხარჯი ასევე ანაზღაურებულ იქნა პრეზიდენტის პირადი სახსრებით", — წერს სალომე ზურაბიშვილი.

2020 წელს საქართველოს პრეზიდენტის ადმინისტრაციამ მივლინებებში ჯამში 272 908 ლარი დახარჯა. მათ შორის უმეტესობა, 236 312 საზღვარგარეთ, ხოლო 36 596 ქვეყნის შიგნით ვიზიტებისთვის. აღსანიშნავია ისიც, რომ პრეზიდენტის ადმინისტრაციის მიერ გამოქვეყნებული დოკუმენტების მიხედვით, სალომე ზურაბიშვილი ან მისი თანამშრომლები ქვეყნის ფარგლებს გარეთ მივლინებით მხოლოდ 2020 წლის პირველ კვარტალში, ანუ იანვრიდან მარტის ჩათვლით იმყოფებოდნენ. შემდეგი ორი კვარტლის ხარჯი მთლიანად შიდა ვიზიტებს უკავშირდება.