დღეს გლდანის მე-5 მიკრორაიონში საქართველოს ბანკის ექსპრეს ფილიალი დააყაჩაღეს. ამის შესახებ On.ge-ს შინაგან საქმეთა სამინისტროს პრესსამსახურში განუცხადეს. გამოძიების ინტერესებიდან გამომდინარე, სამართალდამცავი უწყება დამატებით ინფორმაციას არ ავრცელებს.

პრესსამსახურის ინფორმაციით, შსს საქმეს სისხლის სამართლის კოდექსის 179-ე მუხლით (ყაჩაღობა) იძიებს. ამ მუხლით, ყაჩაღობა, თავდასხმა სხვისი მოძრავი ნივთის მართლსაწინააღმდეგო მისაკუთრების მიზნით, ჩადენილი სიცოცხლისათვის ან ჯანმრთელობისათვის საშიში ძალადობით ანდა ასეთი ძალადობის გამოყენების მუქარით ისჯება თავისუფლების აღკვეთით ვადით ხუთიდან შვიდ წლამდე.

იგივე ქმედება, ჩადენილი: სადგომში ან სხვა საცავში უკანონო შეღწევით; ჯგუფურად ან სატრანსპორტო საშუალების წინააღმდეგ ისჯება თავისუფლების აღკვეთით ვადით ექვსიდან ცხრა წლამდე.

იგივე ქმედება, ჩადენილი: არაერთგზის ან დიდი ოდენობით ნივთის დაუფლების მიზნით ისჯება თავისუფლების აღკვეთით ვადით რვიდან თორმეტ წლამდე.

იგივე ქმედება, ჩადენილი: ორგანიზებული ჯგუფის მიერ ან იმის მიერ, ვინც ორჯერ ან მეტჯერ იყო ნასამართლევი სხვისი ნივთის მართლსაწინააღმდეგო მისაკუთრებისათვის ან გამოძალვისათვის ისჯება თავისუფლების აღკვეთით ვადით თერთმეტიდან თხუთმეტ წლამდე.