თბილისი — ეროვნულ-დემოკრატიული ინსტიტუტი 31 ოქტომბრის საპარლამენტო არჩევნების დისტანციური შეფასების მესამე ფაზას იწყებს. მათი ინფორმაციით, NDI დააკვირდება ისეთ საკითხებს, როგორიცაა საარჩევნო ადმინისტრაცია, პარტიები და კამპანიის გარემო, მედია და დეზინფორმაცია, გენდერი და ინკლუზიურობა. ამასთან, ისინი საარჩევნო პროცესებზე კორონავირუსის გავლენასაც შეისწავლიან.

"აღნიშნული ანგარიში დაეფუძნება NDI-ის მიერ აგვისტოში გამოქვეყნებულ ანგარიშს და გრძელვადიანი ანალიტიკოსების საქმიანობას, რომლებიც საარჩევნო გარემოს სექტემბრის შუა რიცხვებიდან აკვირდებიან. ამ მომენტისთვის, მათ სხვადასხვა მხარეებთან უკვე 200 შეხვედრა გამართეს. ამას გარდა, ოქტომბრის დასაწყისში NDI-მ ორი საარჩევნო ბიულეტენი გამოაქვეყნა, რომელიც საარჩევნო ადმინისტრაციას, კამპანიის გარემოს, საინფორმაციო სივრცესა და ნაკლებად წარმოდგენილი ჯგუფების ჩართულობას ეხებოდა", — ვკითხულობთ განცხადებაში.

NDI-ის ინფორმაციით, არჩევნების დისტანციური შეფასების ჯგუფს ნიუ ჯერსის ყოფილი გუბერნატორი, კრისტინ ტოდ უიტმანი, NDI-ის პრეზიდენტი, დერეკ მიტჩელი, ევრაზიის პროგრამების დირექტორი, ლორა ჯუიტი, საქართველოს ოფისის დირექტორი, ალან გილამი და არჩევნების პროგრამების დირექტორი, სარა კუპერი უხელმძღვანელებენ..

ინსტიტუტის განცხადებით, NDI-ის საერთაშორისო დისტანციური შემფასებელი მისია თავის საქმიანობას მიუკერძოებლად და პროფესიონალურად განახორციელებს და დეტალურ ანგარიშს 3 ნოემბერს გამოაქვეყნებს.