პრემიერმინისტრი გიორგი გახარიას განცხადებით, ზუგდიდში მძევლების უსაფრთხოდ გათავისუფლება პირველი რიგის ამოცანა იყო. ამის შესახებ მან მთავრობის სხდომის დაწყების წინ განაცხადა.

"გუშინ ზუგდიდში შემქნილი ურთულესი ვითარება მსხვერპლის გარეშე დასრულდა. ეს პირველი რიგის ამოცანა იყო მხოლოდ და მიღწეული შედეგი, რომ ჩვენი მოქალაქეების სიცოცხლესა და ჯანმრთელობას საფრთხე აღარ ემუქრება, მძევლების, ეს პირველი რიგის მხოლოდ ამოცანაა", — განაცხადა პრემიერმა.

გახარიას თქმით, შინაგან საქმეთა სამინისტროსა და სამართალდამცავ სისტემის, უმთავრესი ამოცანაა, რომ ზუგდიდში თავდამსხმელი სასწრაფოდ და უმოკლეს ვადებში იყოს დაკავებული.

გუშინ, 21 ოქტომბერს საქართველოს ბანკის ზუგდიდის ფილიალში შეიარაღებული პირი შეიჭრა, რომელმაც მძევლები აიყვანა. ის ნახევარ მილიონ დოლარს, ასევე, ვერტმფრენს ან მანქანით, მძევლებთან ერთად ტერიტორიის უსაფრთხოდ დატოვების გარანტიას ითხოვდა. თავდამსხმელი მძევლის შუამავლობით ტელევიზიებს ვიდეოზარით დაუკავშირდა. მოთხოვნების შესასრულებლად თავდამსხმელმა პოლიციას 2 საათი მისცა, თუმცა დროის ამოწურვის შემდეგ მას საჯაროდ ახალი პირობები არ წამოუყენებია.

ღამის 11 საათისთვის თავდამსხმელმა სამ მძევალთან ერთად საქართველოს ბანკის ტერიტორია დატოვა და გაურკვეველი მიმართულებით წავიდა, დანარჩენი მძევლები კი სამართალდამცავებმა შენობიდან გამოიყვანეს. დილის ხუთი საათისთვის ცნობილი გახდა, რომ თავდამსხმელმა სამივე მძევალი გაათავისუფლა და თავად გაიქცა.

მძევლებს შორის იყო სამეგრელო-ზემო სვანეთის პოლიციის დეპარტამენტის ხელმძღვანელი ავთანდილ გალდავა. გავრცელებული ინფორმაციით, შეიარაღებულ პირთან მოლაპარაკებებს ის აწარმოებდა.

ამ დროისთვის თავდამსხმელის ადგილმდებარეობის ან ვინაობის შესახებ ინფორმაცია არ ვრცელდება. თავდასხმის დროს საქართველოს ბანკში მყოფი არცერთი პირი არ დაშავებულა.

გაიგე მეტი: