პარლამენტის თავმჯდომარე, არჩილ თალაკვაძე პანდემიის პირობებში ნაციონალური მოძრაობის მიერ ჩატარებულ აქციას უპასუხისმგებლო ქცევას უწოდებს და აცხადებს, რომ ამის გამო ჯანდაცვის რესურსების გაორმაგება მოუწევს.

მისივე შეფასებით, ეს იყო "სამარცხვინო თავდასხმა" საზოგადოებრივ ჯანდაცვაზე და მოქალაქეების უსაფრთხოებაზე.

"ამ უპასუხისმგებლო ქცევის გამ მოგვიწევს აჭარაში და სხვაგანაც ჯანდაცვის რესურსების გაორმაგება, ექიმების დატვირთვა ორმაგად იმისათვის, რომ ის რისკები, რომელიც მათ გუშინ საზოგადოებას შეუქმნეს, გავანეიტრალოთ და შევძლოთ შემთხვევათა მატების სტაბილიზაცია", — განაცხადა თალაკვაძემ.

16 ოქტომბერს კოვიდპანდემიის ფონზე ბათუმში ნაციონალურმა მოძრაობამ მრავალრიცხოვანი აქცია გამართა. აქციაზე არ იყო დაცული სოციალური დისტანცია და მოქალაქეებს პირბადეები არ ეკეთათ.

შეკრებილებს ექსპრეზიდენტმა, მიხეილ სააკაშვილმა მიმართა და ამტკიცებდა, რომ ხელისუფლებამ ბათუმში კოვიდინფექცია ხელოვნურად გაავრცელა. ის ხალხს დაპირდა, რომ მომავალში საქართველოს ვერცერთი ვირუსი მოერევა.

ჟურნალისტების კითხვაზე, იღებდა თუ არა ოპოზიცია პასუხისმგებლობა ბათუმში რეკომენდაციების გარეშე ჩატარებულ აქციაზე, პარტიის ლიდერმა, გრიგოლ ვაშაძემ უპასუხა:

"პასუხისმგებლობა აბსოლუტურად მთლიანად ეკისრება კორონავირუსს და შემიძლია მიგაგზავნოთ კორონავირუსთან".

სახალხო დამცველი ნინო ლომჯარიას თქმით, როცა გავრცელების კრიტიკულ მასშტაბს მიღწეულ რეგიონში შესაძლებელია უპირბადოდ, დისტანციის დაუცველად შეიკრიბოს ათასობით ადამიანი, ორგანიზატორების მხრიდან "უკიდურესი უპასუხისმგებლობა".

ამავე თემაზე: