BBC-ის ცნობით, მას შემდეგ რაც ბელარუსმა ქვეყნიდან ლიეტუვისა და პოლონეთის 35 დიპლომატი გააძევა, დიდმა ბრიტანეთმა თავისი ელჩის დროებით გაწვევის გადაწყვეტილება მიიღო. საგარეო საქმეთა მინისტრმა, დომინიკ რააბმა განაცხადა, რომ ეს ნაბიჯი ლიეტუვასა და პოლონეთის სოლიდარობის ნიშნად მიიღეს. მანამდე ბელარუსის პრეზიდენტმა, ალექსანდრე ლუკაშენკომ ლიეტუვასთან და პოლონეთთან საზღვრები ჩაკეტა.

ბელარუსში მიმდინარე საპროტესტო აქციებისა და დემონსტრანტების ძალადობრივი დაშლისა შემდეგ, შვიდმა ევროპულმა ქვეყანამ, მათ შორის — გერმანიამ, რუმინეთმა და ჩეხეთმა მინსკიდან თავიანთი ელჩები გაიწვიეს. 2 ოქტომბერს კი ბელარუსმა პოლონეთისა და ლიეტუვის დიპლომატები გააძევა.

გასულ კვირას, დიდი ბრიტანეთისა და კანადის შემდეგ, ევროკავშირმა სანქციები დაუწესა იმ მაღალჩინოსნებს, როლმებსაც ბელარუსში ადამიანების უფლებების დარღევისა და ოპოზიციის აქტივისტების დევნაში ბრალი მიუძღვით.

ბელარუსში პოლიტიკური დაძაბულობა ისევაა. საპროტესტო აქციების პარალელურად ალექსანდრე ლუკაშენკოს ხელისუფლების მხრიდან რეპრესიები კვლავ გრძელდება. აქციებზე აკავებენ ათეულობით ადამიანს, ოპოზიციის წევრებს კი დაკითხვებზე იბარებენ.

9 აგვისტოს ჩატარებულ საპრეზიდენტო არჩევნების შედეგებს მოსახლეობა არ აღიარებს. დემონსტრანტები პრეზიდენტ ალექსანდრ ლუკაშენკოს გადადგომასა და ხელახალი არჩევნების ჩატარებას მოითხოვენ. ადგილობრივი საარჩევნო კომისიის მიერ გამოქვეყნებულ არჩევნების შედეგებს გაერთიანებული ოპოზიციის კანდიდატი, სვეტლანა ტიხანოვსკაიაც არ ეთანხმება, რომელიც შედეგების გამოცხადების შემდეგ იძულებული გახდა, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ.