აზერბაიჯანთან საზღვრის დადგენის საქმეზე დაკავებული ნატალია ილიჩოვა აცხადებს, რომ ბრალდება, რაც წარუდგინეს მათთვის ძალიან უცხოა.

"თუკი, როგორც ამბობენ, რომ ჩვენ გვაქვს ორასი ათასიანი რუკა, ეს რუკა ჩვენ გვქონდა ყოველთვის, მაგრამ ეს არის 1936 წლის რუკა. შესაბამისად, ამ რუკის თანახმად, ჩვენ გადავდივართ 1929 წელს. ამ 1929 წლის ხელშეკრულებაში პირდაპირ, არამარტო რუკით, არამედ პირდაპირ არის ჩაწერილი, რომ დავით გარეჯის ნაწილს ვკარგავთ და საზღვარი გადის ჩიჩხიტურის კოშკზე. როდესაც ჩემთან სახლში ჩხრეკა ჩატარდა და მასალები ამოიღეს, გაუკვირდათ რატომ გვქონდა ამდენი მასალა? მე იმიტომ მქონდა ამდენი მასალა, რომ ვსწავლობდი და ვიყენებდი მას. რომ არ მქონოდა, შეიძლება არასათანადოდ შემესწავლა იგი", — განაცხადა ილიჩოვამ სასამართლოს სხდომაზე.

მისივე თქმით, დღეს, 21-ე საუკუნეში, სპეციალიზებული კომპიუტერული პროგრამების საშუალებით, უფრო ზუსტად შეგვიძლია რაიმე წერტილი რუკაზე განვსაზღვროთ. ხოლო მაშინ, ეს რუკები ხელით იქმნებოდა და ის არც ისე ზუსტია.

"დღეს როდესაც სპეციალურ პროგრამაში ზრდი თანამედროვე რუკის მასშტაბს და საუბრობ, იმაზე რომ აქ რაღაცა იკარგება ამის შედეგად, ეს არაკორექტულია, სულ მცირე. რაც შეეხება იმას, რომ სადღაც რაღაცა მე გავაკეთე, ეს ნამდვილად მე გავაკეთე, თუ ვარაუდია?", — განაცხადა მან.

დღეს აზერბაიჯანთან საზღვრის დადგენის საქმეზე დაკავებულ ივერი მელაშვილსა და ნატალია ილიჩოვას აღკვეთის ღონისძიების სახით სასამართლომ პატიმრობა შეუფარდა.

საქართველო-აზერბაიჯანის დელიმიტაცია-დემარკაციის კომისიის წევრების, ივერი მელაშვილისა და ნატალია ილიჩოვას მიმართ სისხლის სამართლებრივი დევნა 7 ოქტომბერს დაიწყო.

დაკავებულებს ბრალი სისხლის სამართლის კოდექსის 308-ე მუხლის პირველი ნაწილით წარედგინათ, რაც გულისხმობს საქართველოს საწინააღმდეგო მოქმედებას, რომელიც მიმართული უცხო ქვეყნისათვის საქართველოს მთელი ტერიტორიის ან მისი ნაწილის გადაცემისაკენ ანდა საქართველოს ტერიტორიიდან მისი ნაწილის გამოყოფისაკენ.

მელაშვილი საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსია, ხოლო ილიჩოვა შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორია. ორივეს მიმართ პროკურატურა პატიმრობის შეფარედებას მოითხოვს.

მიმდინარე წლის 17 აგვისტოს საქართველოს გენერალურ პროკურატურაში გამოძიება დაიწყო, რომელიც უცხო ქვეყნისათვის საქართველოს ტერიტორიის ნაწილის გადაცემისაკენ მიმართული მოქმედების განხორციელების საქმეს ეხებოდა. როგორც უწყებაში ამბობენ, საქართველოს საზიანოდ მეზობელი ქვეყანისთვის 3 500-მდე ჰა ფართობი მიწის გადაცემის საფრთხე შეიქმნა.

საქმის აღძვრის შემდეგ საგამოძიებო ორგანოებმა მელაშვილისა და ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

ამავე თემაზე: