გამოძიების მიხედვით, ახალი წლის ღამეს სტამბოლში, ღამის კლუბ რეინაში მომხდარი ტერაქტის მოწყობაში ბრალდებული თურქეთში სირიიდან ჩავიდა. სამართალდამცავები თავდამსხმელს უკვე მესამე დღეა ეძებენ, თუმცა უშედეგოდ. თურქული მედიის ცნობით, მისი ჩასვლის ზუსტი დრო უცნობია, თუმცა ცნობილია ის, რომ 22 ნოემბერს ცენტრალური ანატოლიის პროვინციაში, კერძოდ კონიაში იმყოფებოდა, მანამ სანამ სტამბოლში ჩავიდოდა.

თურქეთის უშიშროების სამსახურმა თავდასხმაში ბრალდებულის ფოტოები გამოაქვეყნა.

სტამბოლში, ღამის კლუბ რეინაზე თავდასხმაში ეჭვმიტანილი.

Hurriyet Daily News-ის ინფორმაციით, კონიაში იგი თავის ცოლთან და ორ შვილთან ერთად ჩავიდა, სადაც სახლი იქირავა. თავდამსხმელის ცოლის თქმით, ტერაქტის შესახებ მან ტელევიზიით შეიტყო და არც იმის შესახებ იცოდა, რომ მისი ქმარი ე.წ. ისლამური სახელმწიფოს წევრი იყო.

თურქული მედიის ცნობით, ღამის კლუბზე თავდასხმა ახალი წლის დადგომიდან მალევე, 01:20 საათზე მოხდა. თავდამსხმელი კლუბთან ტაქსით მივიდა და ცეცხლი პირველად ჯერ დაცვის თანამშრომლებს გაუხსნა, რომლებიც შეუიარაღებელნი იყვნენ, შემდეგ კი სროლა შიგნით გააგრძელა. მოგვიანებით, DJ-ის კაბინაში 120-დან 180-მდე ტყვია იპოვეს.

კლუბის ერთ-ერთი DJ Hurriyet Daily News-თან იმ სცენას იხსენებს, როდესაც თავდამსხმელი კლუბში შეიჭრა. იგი ჰყვება, რომ თავდასხმის დროს კაბინაში იმალებოდა:

"დაახლოებით 1:17 წუთზე მომწერა ჩემმა მეგობარმა გოგომ და მეც ვაპირებდი პასუხის გაცემას, ამიტომ დავიმახსოვრე ეს დრო. კლუბში 700-800 ადამიანი მაინც იქნებოდა. ხალხი ცეკვავდა და ერთობოდა, შემდეგ კი, გასროლის ხმა გავიდე. პანიკაში ჩავვარდით. DJ-ის კაბინასთან ძალიან ვიწრო სივრცეა. ჩემმა მეგობარმა ხელი მომკიდა და იქ ჩამაგდო, თან პირზე ხელი ამაფარა რომ ხმა არ ამომეღო. თავდამსხმელის ფეხის ნაბიჯებს და სუნთქვას ვგრძნობდი. მან კიდევ ერთხელ დაიწყო სროლა და სულ ჯამში, ოთხჯერ დატენა იარაღი. ღმერთს ვთხოვდი, რომ ეს უკანასკნელი ყოფილიყო. სროლა არ წყდებოდა. იგი მარტო იყო და მასთან ერთად სხვა თავდამსხმელი არ ყოფილა".

ტერაქტის შემდეგ მუშაობა შეაჩერა სტამბოლის პოპულარულმა ღამის კლუბებმა, უსაფრთხოების ზომები კი გაიზარდა ტურისტულ ადგილებში.

მომხდარზე პასუხისმგებლობა უკვე აიღო ტერორისტულმა ორგანიზაციამ, ისლამურმა სახელმწიფომ.