საქართველო-ბელარუსის საფეხბურთო მატჩი 8 ოქტომბერს მაყურებლის გარეშე ჩატარდება. ფეხბურთის ფედერაციაში აღნიშნავენ, რომ აღნიშნულ საკითხზე უწყებათა შორის საკოორდინაციო საბჭოს სხდომაზე იმსჯელეს.

უეფას აღმასრულებელი კომიტეტის გადაწყვეტილებით, მიმდინარე წლის ოქტომბრიდან ორგანიზაციის წევრი ქვეყნები თავად იღებენ გადაწყვეტილებას ქვეყანაში არსებული ეპიდვითარების გათვალისწინებით უეფას ეგიდით გასამართ სანაკრებო და საკლუბო მატჩებზე გულშემატკივართა შეზღუდული რაოდენობით დასწრების შესახებ.

როგორც ფედერაციაში აცხადებენ, თბილისის დინამო არენას ტევადობიდან გამომდინარე, სტადიონზე მაყურებლის საერთო რაოდენობის 30%, დაახლოებით 16 000 გულშემატკივარს შეადგენს.

"როგორც საბჭოს სხდომაზე აღინიშნა, ათასობით გულშემატკივრის თავშეყრა ერთ სივრცეში, განსაკუთრებულ ეპიდემიოლოგიურ რისკებთან არის დაკავშირებული, შესაბამისად, ეპიდემიოლოგების, ჯანდაცვის სპეციალისტების რეკომენდაციით, მიღებულ იქნა გადაწყვეტილება, რომ 8 ოქტომბერს თბილისის დინამო არენაზე საქართველოსა და ბელარუსის ეროვნულ ნაკრებთა მატჩი გაიმართება მაყურებლის გარეშე", — აცხადებენ ფედერაციაში.

საქართველოს ეროვნული ნაკრები ბელარუსს ევრო 2020-ის საკვალიფიკაციო ეტაპის ნახევარფინალურ შეხვედრაში დაუპირისპირდება. მატჩი 8 ოქტომბერს 20:00 საათზე თბილისის დინამო არენაზე გაიმართება.