ერთიანი ნაციონალური მოძრაობის აქტივისტი ბოლნისში, არიფ იუსუბოვი, რომლის დაკავებაც ადგილობრივების წინააღმდეგების გამო ვერ შეძლეს, პოლიციას ჩაბარდა. ამის შესახებ On.ge-ს პარტიის პოლიტსაბჭოს წევრმა, დიმიტრი შაშკინმა განუცხადა.

მისი ინფორმაციით, იუსუბოვის სახლში პოლიციელები დაახლოებით საღამოს 17:00 საათზე მივიდნენ, იყვნენ ნასვამ მდგომარეობაში და არ წარუდგენიათ სამსახურის დამადასტურებელი დოკუმენტები. შაშკინი ამბობს, რომ მათ ოჯახის წევრებს მიაყენეს ფიზიკური შეურაცხყოფა, რასაც მეზობლების უკმაყოფილება მოჰყვა.

"სცემეს ოჯახის წევრები, ქალბატონები, დაუხიეს ტანსაცმელი. ბუნებრივია, ჩხუბზე გამოვიდა გარეთ სოფლის მოსახლეობა და ესენი გაიქცნენ. ადვოკატი რომ ჩამოვიდა, მივიდა ბოლნისის პოლიციაში და გაირკვა, რომ არსებობს მოსამართლის განჩინება დაკავების შესახებ. რადგან ეს განჩინება არსებობს, არიფმა მიიღო გადაწყვეტილება, რომ ჩაბარდეს და წარდგეს სასამართლოს წინაშე, რადგან სხვანაირად თავის სიმართლეს ვერ დაამტკიცებდა", — ამბობს შაშკინი On.ge-სთან.

მისივე ინფორმაციით, დაკითხვაზე მყოფმა აქტივისტმა ადვოკატს უთხრა, რომ საქმეში არსებობს ჩვენება, სადაც საუბარია დაკავებულის მიერ სკამის სროლაზე. თუმცა, შაშკინისვე თქმით, არის მეორე ჩვენებაც, სადაც ჩაიხანას მეპატრონე ჰყვება, რომ ქართული ოცნების დეპუტატ გოგი მეშველიანის ძმა შევიდა კაფეში და ადამიანს სახეში ფეხი ჩაარტყა. ენმ-ის პოლიტსაბჭოს წევრი მიუთითებს, რომ ის ამის გამო არ დაუკავებიათ, ისევე, როგორც არავინ დაუკავებიათ ჟურნალისტებზე ძალადობისთვის.

დიმიტრი შაშკინის თქმით, დღევანდელ ინციდენტთან დაკავშირებით მან უკვე მიმართა შსს-ს გენინსპექციას და ითხოვს რეაგირებას პოლიციელების ქმედებაზე.