რუსეთის ფედერაციის პრეზიდენტმა, ვლადიმერ პუტინმა ოკუპირებული აფხაზეთის დე ფაქტო პრეზიდენტ ასლან ბჟანიას ე.წ. დამოუკიდებლობისა და გამარჯვების დღე მიულოცა. აფსნიპრესზე გამოქვეყნებული ტექსტის თანახმად, ეს დღესასწაული აფხაზი ერის სიმამაცესა და სიმტკიცეს ასახიერებს. პუტინი აღნიშნავს, რომ რუსულ-აფხაზური ურთიერთობები მოკავშირეობისა და სტრატეგიული პარტნიორობის პრინციპების საფუძველზე ვითარდება. ის ბჟანიას სოციალურ-ეკონომიკური ამოცანების გადასაწყვეტად და ეროვნული უსაფრთხოების უზრუნველსაყოფად მხარდაჭერას ჰპირდება.

ოკუპირებულ აფხაზეთში 30 სექტემბერს გამარჯვებისა და დამოუკიდებლობის დღეს ზეიმობენ. ქართულმა შეიარაღებულმა ძალებმა აფხაზეთი 1993 წლის სექტემბერს დატოვეს. სამხედრო დაპირისპირების შედეგად თბილისმა რეგიონზე კონტროლი დაკარგა. მსხვერპლი დიდი იყო კონფლიქტში მონაწილე ორივე მხარეს, დაიღუპა ათასობით ადამიანი, 300 000-ზე მეტი დევნილად იქცა.

2008 წლის რუსუთ-საქართველოს ომის შემდეგ რუსეთმა აფხაზეთისა და ე.წ. სამხრეთ ოსეთის "დამოუკიდებლობა" აღიარა. აფსნიპრესის ცნობით, ასლან ბჟანიას "გამარჯვებისა და დამოუკიდებლობის დღე" ნიკარაგუამ და დნესტრისპირეთმა მიულოცა.