ქართული ოცნების აღმასრულებელმა მდივანმა, ირაკლი კობახიძემ განაცხადა, რომ მათი პარტიის გლდანის მაჟორიტარი დეპუტატობის კანდიდატის, ლევან კობიაშვილის შეხვედრაზე მისი კონკურენტის, ნიკა მელიას 4 მხარდამჭერი სპეციალურად თეთრი მაისურებით მივიდნენ. კობახიძის თეორიით, ეს იმიტომ გააკეთეს, რომ "კვალი დატყობოდათ".

"თეთრი პერანგები ეცვათ იმისთვის, რომ კვალი დატყობოდა მაქსიმალურად იმ ინცინდენტს, რომელიც უნდა მომხდარიყო მათი გათვლით. საღამოს ნახეს ისინი სხვა ტანსაცმელში გამოწყობილი", — განაცხადა კობახიძემ.

მისი თქმით, ქართული ოცნების მხარდამჭერი აქტივისტები მკაცრად იყვნენ გაფრთხილებული, რომ პროვოკაციას არ აჰყოლოდნენ და სწორედ ამიტომ არ მოხდა იქ ასეთი ინცინდენტი.

"ნიკა მელია, ვიცით, რომ არის პროფესიონალი პროვოკატორი. არ გაგვიკვირდა მათგან, მომზადებულებიც იყვნენ ჩვენები და არ მოხდა ინცინდენტი", — თქვა ქართული ოცნების აღმასრულებელმა მდივანმა.

კობახიძის თქმით, საღამოს აღნიშნული 4 მხარდამჭერი სხვა ტანსაცმლით ნახეს.

ბოლო პერიოდში პარტიები ხშირად ადანაშაულებენ ოპონენტებს თავდასხმასა და პროვოკაციის მოწყობაში. როგორც ერთიანი ნაციონალური მოძრაობისა და ევროპული საქართველოს წარმომადგენლები აცხადებენ, მმართველი გუნდის მხრიდან მათზე ზეწოლა ხორციელდება, რასაც ქართულ ოცნებაში უარყოფენ.

გაიგე მეტი: