იუსტიციის უმაღლესი საბჭოს წევრს უზენაესი სასამართლოს მოსამართლეობის კანდიდატის შეფასების, გასაუბრების ან კენჭისყრის შედეგების შესახებ ინფორმაციის გავრცელების გამო პასუხისმგებლობა დაეკისრება. შესაბამისი ცვლილება საქართველოს პარლამენტმა საერთო სასამართლოების შესახებ კანონში გუშინ, 30 სექტემბერს დაამტკიცა.

თავდაპირველ ვერსიაში იუსტიციის უმაღლესი საბჭოს წევრების მიმართ სისხლისსამართლებრივი პასუხისმგებლობის შემოღებაზე იყო საუბარი, თუმცა, როგორც პარლამენტის პრესსამსახურში On.ge-ს უთხრეს, მოგვიანებით დაზუსტდება, საბოლოოდ რა ტიპის პასუხისმგებლობა იქნება.

იუსტიციის უმაღლესი საბჭოს არამოსამართლე წევრმა, ნაზი ჯანეზაშვილმა On.ge-ს განუცხადა, რომ აღნიშნულის შესახებ 25 სექტემბერს გაიგო, როდესაც ეს საკითხი საბჭოს საჯარო განხილვაზე გამოიტანეს. მისი თქმით, სხდომაზე იუსტიციის საბჭოს მოსამართლე წევრმა, დიმიტირი გვრიტიშვილმა თქვა, რომ პარლამენტს ეს იდეა მან შესთავაზა და ამის მიზეზი თავად ჯანეზაშვილია, რომელიც ამ თემებზე ღიად საუბრობს.

"სხვანაირად რომ ვერ გამაჩუმეს, ახლა სისხლის სამართლით უნდათ, რომ გამაჩუმონ.

გვრიტიშვილმა თქვა, რომ ეს იყო მისი იდეა, რაც ავტომატურად ნიშნავს, რომ ეს არის კლანის იდეა. ამ პროცესში, როგორც საბჭოს წევრი, ჩართული არ ვყოფილვარ", — ამბობს ნაზი ჯანეზაშვილი.

On.ge დაუკავშირდა იუსტიციის უმაღლესი საბჭოს მოსამართლე წევრს, დიმიტრი გვრიტიშვილს, რომელმაც განაცხადა, რომ მოქმედი რეგულაციით კანდიდატების შეფასების პროცესი დახურულია, ანუ ფარული კენჭისყრით ხდება და ახალი რეგულაციით ეს პროცესი ღია გახდება ისე, რომ საბჭოს წევრებისთვის ერთმანეთის პოზიციები ცნობილი იქნება, თუმცა ამ ინფორმაციის გარეთ გამოტანა დაუშვებელია.

"მკვიდრდება ისეთი რეგულაცია, როდესაც საბჭოს წევრები ღიად გამოვთქვამთ ჩვენს შეხედულებებს ამა თუ იმ კანდიდატის შესახებ და შესაბამისად, იქვე ვაფიქსირებთ პოზიციას: მხარს ვუჭერ ამ კანდიდატს, თუ არ ვუჭერ მხარს, რამდენი ქულით ვაფასებ მის კომპეტენციას, როგორ ვაფასებ მის კეთილსინდისიერებას", — ამბობს დიმიტრი გვრიტიშვილი.

მისი თქმით, როცა რამეზე კონფიდენციალობის რეჟიმია დაწესებული, შესაბამისი პასუხისმგებლობაც უნდა იყოს იმ პირის მიმართ, ვინც ამ რეჟიმს დაარღვევს.

"სისხლის სამართლის კოდექსი იცნობს პასუხისმგებლობის დაკისრებას კონფიდენციალობის დამრღვევისათვის, ამიტომ აქ ახალი, არაჩვეულებრივი და, როგორც ნაზი ჯანეზაშვილმა დაარქვა "გვრიტიშვილის ფანტაზიაში წარმოშობილი" სტანდარტი კი არ მკვიდრდება, ეს არის საერთაშორისო სტანდარტი", — განაცხადა გვრიტიშვილმა.

On.ge, ასევე, დაუკავშირდა პარლამენტის საპროცედურო საკითხთა და წესების კომიტეტის თავმჯდომარეს, გურამ მაჭარაშვილს, რომელმაც განაცხადა, რომ აღნიშნულზე პასუხისმგებლობა დგება იმ შემთხვევაში, თუ მტკიცებულებები არსებობს იმის შესახებ, რომ გასაიდუმლოებული ინფორმაცია შეგნებულად გაჟღერდა.

"ამ შემთხვევაში მხოლოდ ამაზეა საუბარი, გასაიდუმლოებული ინფორმაციის გაჟღერებაზე შეგნებულად. ნაზი ჯანეზაშვილი იურისტია და უნდა იცოდეს, რომ თუ მტკიცებულებები არაა იმაზე, რომ შეგნებულად გაავრცელა ინფორმაცია, არავინ პასუხს არ მოსთხოვს", — განაცხადა მაჭარაშვილმა.

მისივე თქმით, სისხლისამართლებრივი პასუხისმგებლობა იქნება, თუ ადმინისტრაციული, ამ საკითხზე იმსჯლებენ პარლამენტის თავმჯდომარის ხელმძღვანელობით შექმნილ ფორმატიში, მათ შორის, ვენეციის კომისიიდან დასკვნას ელოდებიან.