მთავარი არხის თანამფლობელი, გიორგი რურუა, მოუწოდებს ოპოზიციას, ნაცვლად საზიანო ლანძღვისა, ეკონომიკურ საკითხებზე კონცენტრირდნენ. ამის შესახებ განცხადება მან საკუთარ facebook-ზე გამოაქვეყნა.

"ოპოზიციას მივმართავ, ჩვენთვის საინტერესოა, ის თუ რამდენ ხანში იქნება შესაძლებელი ლარის კურსის გამყარება, სამუშაო ადგილების შექმნა წლების მიხედვით. ასევე, არჩევნებში გამარჯვების შემთხვევაში, რამდენ თვეში მოახერხებთ გადასახადების შემცირებას (საშემოსავლო, მოგების, დღგ და ქონების). როდის განახლდება ანაკლიის პორტის მშენებლობა და სხვა მრავალი საკითხი, რაც სასიცოცხლოდ მნიშვნელოვანია საქართველოსთვის.

ჩემი თხოვნა იქნება, ვკონცენტრირდეთ ეკონომიკურ საკითხებზე და არა ამ დამაბნეველ, საზიანო ლანძღვაზე, რაც ბოლო კვირებში ისმის მედიაში", — წერს რურუა განცხადებაში.

ოპოზიციიის შეფასებით, გიორგი რურუა პოლიტპატიმარია, რომელიც 2019 წლის 18 ნოემბერს იარაღის უკანონო ტარების ბრალდებით დააკავეს. მისი უფლებადამცველი და პარტნიორი ნიკა გვარამია აცხადებს, რომ გიორგი რურუას იარაღი ჩაუდეს. დაკავებული ბრალს არ აღიარებს და ამბობს, რომ იარაღი მას საერთოდ არ უნახავს.

როგორც ერთიანი ნაციონალური მოძრაობა და ევროპული საქართველო აცხადებენ, რურუას გათავისუფლება, სხვა პოლიტპატიმრებთან ერთად 8 მარტის შეთანხმების ნაწილი იყო. აღნიშნულ შეთანხმებას უარყოფენ მმართველ გუნდში და ამბობენ, რომ სასამართლოს სისტემაზე გავლენას ვერ იქონიებენ. მაშინ, როცა სალომე ზურაბიშვილმა ირაკლი ოქრუაშვილი და გიგი უგულავა შეიწყალა, რურუა პატიმრობაში დატოვა.