მიუხედავად იმისა, რომ პარლამენტის იურიდიულ საკითხთა კომიტეტმა ახალი პოლიტიკური ცენტრი - გირჩის საკანონმდებლო ინიციატივის განხილვა 10 დღით გადადო, გირჩი საკუთარი გეგმების შეცვლას არ აპირებს:

"ჩვენ არაფერს არ ვცვლით, გამომდინარე იქიდან, რომ იურიდიულ კომიტეტს ჩვენი კანონპროექტის განსახილველად ჰქონდა 1 თვე, რაც საკმარისი იყო იმისთვის, რომ განეხილათ ეს კანონპროექტი. შესაბამისად, არაფერი არ იცვლება. 31-ში 21 საათზე ჩვეულებრივ, ისევე როგორც განვაცხადეთ აქამდე, არანაირი ცვლილება არ იქნება."

იურიდიულ საკითხთა კომიტეტის თავმჯდომარის, ეკა ბესელიას თქმით, გირჩის ინიციატივა ნარკოპოლიტიკის მხოლოდ ერთი ფრაგმენტია. მისივე თქმით, ამ მიმართულებით სისტემური ხედვაა ჩამოსაყალიბებელი:

"გთავაზობთ, რომ სისტემური ხედვა ჩამოვაყალიბოთ. ასეთი ფრაგმენტული განხილვები შეიძლება არ იყოს აპ პროცესისთვის პოზიტიური ფონის შემქმნელი. ამიტომ, ალბათ, უმჯობესი იქნება, დამატებით კონსულტაციები გავიაროთ, დამატებითი შეხვედრები გავმართოთ და ამიტომ მოგმართეთ თხოვნით."

გირჩის ინიციატივა ითვალისწინებს საქართველოს სისხლის სამართლის კოდექსში და ადმინისტრაციულ სამართალდარღვევათა კოდექსში ცვლილებების შეტანას.

გირჩმა ხელისუფლებას ულტიმატუმით 16 ნოემბერს მიმართა: თუ ახალ წლამდე არ შეიცვლება ნარკოპოლიტიკა, ისინი საჯაროდ დარგავენ მარიხუანას.