თბილისის საქალაქო სასამართლომ ორი პირის მკვლელობის მცდელობასა და თავისუფლების უკანონოდ აღკვეთაში კონსტიტუციური უსაფრთხოების დეპარტამენტის აფხაზეთის მთავარი სამმართველოს ყოფილი უფროსი რომან შამათავა დამნაშავედ სცნო და 8 წლით თავისუფლების აღკვეთა მიესაჯა.

პროკურატურის ვერსიით, 2008 წლის ზაფხულში, შსს კონსტიტუციური უსაფრთხოების დეპარტამენტის აფხაზეთის მთავარი სამმართველოს უფროსმა რომან შამათავამ განიზრახა სიკვდილით დაესაჯა ხაიშის სატყეო უბნის რეინჯერი დათო ცინდელიანი და თავდაცვის სამინისტროს დაზვერვის დეპარტამენტის ოფიცერი პაატა ქარდავა. პროკურატურის ცნობით, ბრალდებულს გააჩნდა დაუდასტურებელი ინფორმაცია, რომ ისინი თანამშრომლობდნენ აფხაზეთის სეპარატისტულ სამსახურებთან:

"რომან შამათავას დავალების შესაბამისად, შს სამინისტროს კონსტიტუციური უსაფრთხოების დეპარტამენტის თანამშრომლებმა 2008 წლის 17 აგვისტოს, ქუთაისში დააკავეს დათო ცინდელიანი, აღუკვეთეს თავისუფლად გადაადგილების უფლება და ბათუმში რომან შამათავას გადასცეს.

რომან შამათავამ თავზე ტომარაჩამოცმული დათო ცინდელიანი კატარღით ზღვაში გაიყვანა და უმწეო მდგომარეობაში მყოფს ცეცხლსასროლი იარაღიდან თავის არეში ესროლა. შემდეგ კი დანაშაულის კვალის დაფარვის მიზნით დათო ცინდელიანს მოაბა კატარღის ღუზა და გადააგდო ზღვაში.

2008 წლის 27 აგვისტოს, რომან შამათავას დავალებით, შს სამინისტროს განსაკუთრებულ დავალებათა სამმართველოს მუშაკებმა ზუგდიდში უკანონოდ აღუკვეთეს თავისუფლება პაატა ქარდავას და გადასცეს რომან შამათავას, რომელმაც თვალებახვეული და ხელბორკილდადებული პაატა ქარდავა კატარღით გაიყვანა ზღვაში, ფეხზე მოაბა სიმძიმე, უმწეო მდგომარეობაში მყოფს ცეცხლსასროლი იარაღიდან თავის არეში ესროლა და დანაშაულის კვალის დაფარვის მიზნით კატარღიდან ზღვაში გადააგდო".

პროკურატურამ რომან შამათავას ბრალდება სისხლის სამართლის კოდექსის 109-ე მუხლის მეორე ნაწილის ბ ქვეპუნქტით წარუდგინა, რაც გულისხმობს განზრახ მკვლელობას უმწეო მდგომარეობაში მყოფის მიმართ და 143-ე მუხლის მეორე ნაწილის გ ქვეპუნქტით და მე-4 ნაწილის ა ქვეპუნქტით, რაც გულისხმობს თავისუფლების უკანონო აღკვეთას სხვა დანაშაულის ჩადენის გაადვილების მიზნით, ჩადენილი ორგანიზებული ჯგუფის მიერ.

თბილისის საქალაქო სასამართლოს გადაწყვეტილებით რომან შამათავას განზრახ მკვლელობის ბრალდება, განზრახ მკვლელობის მცდელობით გადაუკვალიფიცირდა. იგი გამართლდა ორგანიზებული ჯგუფის მიერ ჩადენილ თავისუფლების უკანონო აღკვეთის ნაწილში და მისი ქმედება დაკვალიფიცირდა როგორც მკვლელობის გაადვილების მიზნით ჩადენილი თავისუფლების უკანონო აღკვეთა.

ბრალდების მხარე თბილისის საქალაქო სასამართლოს განაჩენს სამოტივაციო ნაწილის ჩაბარების შემდეგ სააპელაციო წესით გაასაჩივრებს.